Агар Украина Олий Радаси аёлларни сафарбар қилиш тўғрисидаги қонунни қабул қилса, президент Владимир Зеленский уни имзоламайди. Бу ҳақда Зеленский йил якунлари бўйича ўтказилган матбуот анжуманида ваъда берди.
“Аёллар — йўқ, имзо чекмайман” — деди у тегишли саволга жавобан.
Украина президенти сафарбарлик ёшини 27 ёшдан 25 ёшгача пасайтириш ғояси ҳақида гапирар экан, “агар барча далиллар келтирилса” бу ташаббусга “қўшилишини” таъкидлади.
Айни пайтда Украина Олий Радаси аёлларни ҳарбий хизматга чақириш имкониятини кўзда тутувчи қонун лойиҳасини муҳокама қилмоқда. 18 декабрь куни “Халқ хизматкори” партиясидан Рада депутати Марьяна Безуглая Facebook’да ҳужжат ҳақида гапирди.
Депутат формулалардан бирининг мазмун-моҳиятига тўхталиб ўтди:
“Ҳарбий рўйхатга олинган аёллар ҳарбий хизматга чақирилиши ёки уруш даврида давлат мудофаасини таъминлаш бўйича ишларни бажариш учун жалб этилиши мумкин”.
Қонун лойиҳасида, шунингдек, ҳарбий ҳолат даврида ҳарбий рўйхатга олинган аёллар қўллаб-қувватлаш бўлинмаларида хизмат қилиш учун чақирилиши мумкинлиги айтилади. Бундан ташқари, шартномага кўра, улар жанговар бўлинмаларга ҳам чақирилиши мумкин, деди Безуглая.
Депутат давлат хавфсизлик идораларини аёлларни ҳарбий рўйхатга олиш борасидаги сиёсати учун танқид қилди. Шу билан бирга, у аёллар “фронтга” фақат ихтиёрий равишда бориши кераклигини таъкидлади.
Изоҳ (0)