Xitoy shimoli-g‘arbida zilzila sodir bo‘lib, buning oqibatida 100 dan ortiq kishi halok bo‘lgandi. Shavkat Mirziyoyev shu munosabat bilan Si Szinpinga hamdardlik yo‘lladi.
Prezident matbuot kotibining xabar qilishicha, davlat rahbari Xitoyning Gansu va Sinxay muzofotlarida zilzila oqibatida halok bo‘lganlarning oila a’zolari va yaqinlariga hamdardlik bildirdi, jabrlanganlar shifo topishini tiladi.
Zilzila 19-dekabrga o‘tar kechasi shimoli-g‘arbiy Gansu provinsiyasida yuz bergandi. 6,2 magnitudali zilzila uchog‘i 10 kilometr chuqurlikda, epimarkazi esa Sinxay provinsiyasi bilan chegaradan 5 kilometr uzoqlikda joylashgan.
So‘nggi ma’lumotlarga ko‘ra, Gansu provinsiyasida 105 kishi, Sinxayda 11 kishi halok bo‘lgan. Bundan tashqari 300 dan ortiq odam jabrlangan. Xitoy rahbari Si Szinpin keng ko‘lamli qidiruv amaliyotini o‘tkazishga chaqirdi.
Ofat zonasida suv ta’minoti uzilgan, elektr uzatish liniyalari, shuningdek, transport infratuzilmasi obyektlari shikastlangan. Birgina Gansu provinsiyasida 4 782 ta uy zarar ko‘rgan. Rasmiylar milliy zilzila favqulodda choralar darajasini ikkinchi darajaga ko‘tardi.
Izoh (0)