Hirotda yana zilzila yuz berdi, uylar qulab tushdi

Afg‘onistonning Hirot viloyatida yana kuchli zilzilalar yuz berdi, deb xabar bermoqda “Daryo”ning Afg‘onistondagi muxbiri.

11-oktyabr, chorshanba kuni ertalab soat 05:12 atrofida Hirotda yana 6,3 magnitudali zilzila sodir bo‘ldi. Yer silkinishi Eronning Mashhad shahri, Afg‘onistonning Farah, Nimro‘z va Bodg‘is viloyatlarida ham sezilgan.

Zilzila oqibatida Hirot shahrining barcha hududlarida elektr energiyasi uzilib qolgan, uylar qulab tushgan, odamlar vayronalar ostida qolmoqda. Qurbonlar haqida ma’lumotlar aniqlanmoqda.

Hirotning Rabot Sangi tumanidagi Sinjob va Band Bagharcher hududlarida yarim soatda ketma-ket uchta kuchli zilzila sodir bo‘ldi: birinchisi 6,3 magnitudali, ikkinchisi 5,4 magnitudali, oxirgisi 4,1 magnitudali zilzila, deyiladi xabarda.

7-oktyabr kuni Afg‘onistonning Hirot viloyatida 6,2 magnitudali zilzila qayd etilgandi. Tabiiy ofat oqibatida 2 yarim mingga yaqin odam halok bo‘ldi.