Jinoyat ishlari bo‘yicha Andijon viloyati sudi hukmi bilan bloger Otabek Ahliddinov 7 yil-u 1 oy muddatga ozodlikdan mahrum qilindi. Bu haqda “Ezgulik” inson huquqlari jamiyati rahbari Abdurahmon Tashanov o‘zining Facebook dagi sahifasi orqali ma’lum qildi.
Ma’lum qilinishicha, Otabek Ahliddinov Jinoyat kodeksining 167-moddasi (o‘zlashtirish yoki rastrata yo‘li bilan talon-taroj qilish) 2-qismida nazarda tutilgan jinoyatni sodir etganlikda ayblangan.
U Andijon viloyati Shahrixon tumanidagi markaziy poliklinikaning bo‘lim rahbari lavozimida faoliyat olib borgan. Ayblov xulosasiga ko‘ra, Ahliddinov 200 million so‘mdan ortiq pulni o‘zlashtirishda ayblangan.
Bloger shu yilning sentyabrida qamoqqa olingan. Dastlab u jinoyat ishlari bo‘yicha Xonobod tumani sudi hukmi bilan 5 yil 1 oydaga ozodlikdan mahrum qilingan. So‘ng prokuraturaning protesti asosida appelyatsiya sudi ishni qayta ko‘rib, muddatni 7 yil 1 oyga uzaytirgan.
- Avvalroq 6,6 yil muddatga ozodlikdan mahrum etilgan bloger Otabek Sattoriy umumiy tartibli koloniyadan manzil-koloniyaga o‘tkazilgani to‘g‘risida xabar berilgandi.
Izoh (0)