Yangi Zelandiya hukumati o‘smirlar chekishni to‘xtatishga qaratilgan yangi qonunni bekor qilishga tayyorlanmoqda. Mamlakat budjetini muvozanatlash uchun 2009-yildan keyin tug‘ilganlarga sigaret sotishga yana ruxsat berilishi mumkin.
Qonun tamaki mahsulotlarini sotish bo‘yicha yosh cheklovlaridan tashqari, tamaki mahsulotlaridagi nikotinning ruxsat etilgan miqdorini, ularni faqat maxsus tamaki do‘konlari orqali sotishni nazarda tutadi. Bunday do‘konlar butun mamlakat bo‘ylab 600 dan ortiq bo‘lmasligi kerak.
Ushbu qoidalar 2024 yilning yozida kuchga kirishi kerak. Hukumat bu rejalardan voz kechishga qaror qildi, shunda sigareta sotishdan tushgan daromad budjet yo‘qotishlarini qoplashga yo‘naltiriladi.
Bosh vazir Kristofer Laksonning fikricha, qonunni bekor qilish yashirin tamaki bozori paydo bo‘lishining oldini oladi. Biroq sog‘liqni saqlash ekspertlarining fikricha, bunday siyosat yiliga besh ming kishining hayotiga zomin bo‘lishi mumkin, deb yozadi The Guardian.
Avvalroq Meksikada jamoat joylarida chekish va do‘konlarda tamaki reklamasini butunlay taqiqlovchi qonun kuchga kirgan edi.
Izoh (0)