Faoliyatini 2012-yilda boshlab, regiondagi eng taraqqiy etayotgan kompaniyalardan biri deya o‘ziga ta’rif bergan Enter Engineering kompaniyasi minglab ishchilariga o‘z vaqtida maosh bermayotgani aytildi. Kompaniya mas’uli OAVning bu haqidagi savoliga hech qanday izoh bermasligini bildirdi.
“Daryo”ga shikoyat qilgan ishchilarga ko‘ra, minglab xodimlar maosh bilan bog‘liq muammoga duch kelgan.
Sentyabr oyidagi maoshimizni ham olganimiz yo‘q. Hali oktyabr oyi turibdi. Oylik ikki yarim, uch oygacha kechikyapti, — deydi shaxsi sir qolishini so‘ragan murojaatchi.
Murojaatchining aytishicha, shikoyatchi kimligi aniqlansa, rahbariyat uni ishdan bo‘shatadi. Va xodimning ishsiz qolish ehtimoli katta. Shu sabab ular muammoni baralla aytishdan qo‘rqadi.
Yana bir murojaatchi oylik maoshiga ishonib, avtomobil xarid qilish uchun avtokredit olganini, maoshi kechikayotgani sabab, kreditni o‘z vaqtida to‘lamagani uchun ishi sudga oshganini aytmoqda.
Ishchilarning aytishicha, xodimlar uchun kompaniyada asosiy muammo maoshning kechikishi.
Sentyabr oyi uchun maoshimning 30 foizini plastikka tashlab berishgan, qolgan 70 foizini naqd shaklda olishim kerak. Lekin mana noyabr oyi yakun bo‘lyaptiki, sentyabr oyining maoshini ololganim yo‘q. Oylikka qarab reja qilamiz, qo‘shnilardan qarz olaverib, qarzga botib ketdik, — deydi yana bir ishchi maoshini ololmayotganini aytar ekan.
Shaxsini ochiqlasa, ishdan bo‘shatilishidan qo‘rqqan yana bir ishchining ma’lumot berishicha, maoshlarning o‘z vaqtida berilmasligi faqat o‘zbekistonlik, oddiy ishchilarga qilinayotgan adolatsizlik hisoblanadi.
Bu tashkilot rahbarlari ishchilarini o‘ylamaydi. Qancha odam kasal, oilasi bor, lekin puli yo‘q. Mening ham kreditlarim bor. To‘lay olmayapman. Chet eldan kelgan ishchilarga o‘z vaqtida oylik berishadi. Masalan, turklar, qozoqlar va hindlar o‘z vaqtida maoshini oladi. Ularda bunday muammo yo‘q. Biz o‘zimizning yurtimizda qul bo‘ldik. Sizlardan iltimos, shu masalada yordam bering, — deydi bu haqda gapirgan ishchi.
Besh nafar farzandi bor ishchining qo‘shimcha qilishicha, rahbariyat ishchilarini oylikni ertaga beramiz, degan davomli yolg‘onlari bilan aldab keladi.
Ertaga, ertaga, deyishdan charchashmadi. Shuncha payt aldab kelishdi. Bugun esa endi dekabr oyida beriladi maoshlar deyishdi. Qarzga botib ketdik, bizda ham ro‘zg‘or bor, tirikchiligimiz bor. O‘z vaqtida maosh berishsa, yaxshi bo‘lardi, — deydi ism-sha’rifi sir qolishini so‘ragan ishchi.
“Daryo” murojaatchilar iddaosi qanchalik rost yoki yolg‘onligiga aniqlik kiritish maqsadida kompaniya mas’uli bilan bog‘landi. Mas’ul OAV so‘rovini eshitgach, bu holat bo‘yicha hech qanday izoh berilmasligini ma’lum qildi.
Ishchilar bergan ma’lumotga ko‘ra, ayni kunda kompaniyada faoliyat yurituvchi 50 ming nafar xodim maoshini o‘z vaqtida ololmayapti. “Daryo” ishchilar aytayotgan bu raqamlarni tekshirib ko‘rish imkoniyatiga ega emas, boisi kompaniya nashrning mazkur masalasi yuzasidan berilgan qo‘shimcha savollarini ham ochiq qoldirdi.
Izoh (0)