Namangan viloyatining Yangiqo‘rg‘on tumanidagi Avtomobil yo‘llaridan foydalanish unitar korxonasi ishchilari ikki oydan beri maosh ololmayotganini aytmoqda. Bu haqda xabar bergan ishchilardan birining aytishicha, rahbariyat bu muammoga eʼtiborsiz qaramoqda.
Korxonada oddiy ishchi bo‘lib ishlab kelamiz. Bizni qiynayotgan muammo shundaki, rahbariyat ikki oydan beri oylik bermayapti. 2023-yilning 15-iyun kuni 600 ming so‘mdan plastik kartamizga tashlab berishgandi. O‘shandan beri pul berishmayapti, — deydi ismi sir qolishini so‘ragan ishchi.
Korxona ishchisining qo‘shimcha qilishicha, maoshsizlik sabab ayni paytda uning ro‘zg‘orida muammolar kuzatilmoqda.
Hozir yegani nonimiz ham qolmadi, — deydi murojaatchi.
“Daryo” jurnalisti bilan suhbatlashgan masʼul — Yangiqo‘rg‘on tuman avtomobil yo‘llaridan foydalanish unitar korxonasi hisobchisi Saidjon Mamatov ishchilar oylik ololmayotganini tasdiqladi.
Korxonada 80 nafar xodim faoliyat yuritsa, iyun oyi maoshi va iyul oyi avansini hali to‘lab berolmadik. Korxona hisob raqamida pul yo‘qligi sabab shu muammo yuzaga kelgan. Ammo muammo yechimi bilan shug‘ullanyapmiz, — deydi Saidjon Mamatov.
Korxona hisobchisining aytishicha, tashkilot qurilish ishlarini amalga oshirib, topgan mablag‘i hisobidan o‘zini o‘zi moliyalashtiradi.
Bunaqa holat bo‘lmas edi. Muammoni ikki kunda, uzog‘i bilan juma-shanba kunlarida hal etamiz, — deydi masʼul.
“Daryo” voqealar rivojini kuzatishda davom etadi.
Izoh (0)