Enter Engineeringънинг минглаб ишчилари маош ололмаётгани айтилди. Компания масъули бунга изоҳ бермаслигини маълум қилди 

Фаолиятини 2012 йилда бошлаб, региондаги энг тараққий этаётган компаниялардан бири дея ўзига таъриф берган Enter Engineering компанияси минглаб ишчиларига ўз вақтида маош бермаётгани айтилди. Компания масъули ОАВнинг бу ҳақидаги саволига ҳеч қандай изоҳ бермаслигини билдирди.

“Дарё”га шикоят қилган ишчиларга кўра, минглаб ходимлар маош билан боғлиқ муаммога дуч келган.

Сентябрь ойидаги маошимизни ҳам олганимиз йўқ. Ҳали октябрь ойи турибди. Ойлик икки ярим, уч ойгача кечикяпти, — дейди шахси сир қолишини сўраган мурожаатчи. 

Мурожаатчининг айтишича, шикоятчи кимлиги аниқланса, раҳбарият уни ишдан бўшатади. Ва ходимнинг ишсиз қолиш эҳтимоли катта. Шу сабаб улар муаммони баралла айтишдан қўрқади.

Яна бир мурожаатчи ойлик маошига ишониб, автомобиль харид қилиш учун автокредит олганини, маоши кечикаётгани сабаб, кредитни ўз вақтида тўламагани учун иши судга ошганини айтмоқда. 

Ишчиларнинг айтишича, ходимлар учун компанияда асосий муаммо маошнинг кечикиши. 

Сентябрь ойи учун маошимнинг 30 фоизини пластикка ташлаб беришган, қолган 70 фоизини нақд шаклда олишим керак. Лекин мана ноябрь ойи якун бўляптики, сентябрь ойининг маошини ололганим йўқ. Ойликка қараб режа қиламиз, қўшнилардан қарз олавериб, қарзга ботиб кетдик, — дейди яна бир ишчи маошини ололмаётганини айтар экан.

Шахсини очиқласа, ишдан бўшатилишидан қўрққан яна бир ишчининг маълумот беришича, маошларнинг ўз вақтида берилмаслиги фақат ўзбекистонлик, оддий ишчиларга қилинаётган адолатсизлик ҳисобланади.

Бу ташкилот раҳбарлари ишчиларини ўйламайди. Қанча одам касал, оиласи бор, лекин пули йўқ. Менинг ҳам кредитларим бор. Тўлай олмаяпман. Чет элдан келган ишчиларга ўз вақтида ойлик беришади. Масалан, турклар, қозоқлар ва ҳиндлар ўз вақтида маошини олади. Уларда бундай муаммо йўқ. Биз ўзимизнинг юртимизда қул бўлдик. Сизлардан илтимос, шу масалада ёрдам беринг, — дейди бу ҳақда гапирган ишчи.

Беш нафар фарзанди бор ишчининг қўшимча қилишича, раҳбарият ишчиларини ойликни эртага берамиз, деган давомли ёлғонлари билан алдаб келади.

Эртага, эртага, дейишдан чарчашмади. Шунча пайт алдаб келишди. Бугун эса энди декабрь ойида берилади маошлар дейишди. Қарзга ботиб кетдик, бизда ҳам рўзғор бор, тирикчилигимиз бор. Ўз вақтида маош беришса, яхши бўларди, — дейди исм-шаърифи сир қолишини сўраган ишчи. 

“Дарё” мурожаатчилар иддаоси қанчалик рост ёки ёлғонлигига аниқлик киритиш мақсадида компания масъули билан боғланди. Масъул ОАВ сўровини эшитгач, бу ҳолат бўйича ҳеч қандай изоҳ берилмаслигини маълум қилди. 

Ишчилар берган маълумотга кўра, айни кунда компанияда фаолият юритувчи 50 минг нафар ходим маошини ўз вақтида ололмаяпти. “Дарё” ишчилар айтаётган бу рақамларни текшириб кўриш имкониятига эга эмас, боиси компания нашрнинг мазкур масаласи юзасидан берилган қўшимча саволларини ҳам очиқ қолдирди.