Toshkent, Navoiy, Sirdaryo va Qashqadaryo viloyatlarida haydovchilik guvohnomalarini olib berishni vaʼda qilgan shaxslar qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departamentning Yangiyo‘l shahar bo‘limi tomonidan o‘tkazilgan tezkor tadbirda J.D. ismli shaxs fuqaro A.Y.ga o‘zini go‘yoki Olmaliq shahar YHXB xodimi sifatida tanishtirib, unga o‘quv mashg‘ulotlariga qatnashmasdan tanishlari yordamida haydovchilik guvohnomasini olib berishni vaʼda qilgani aniqlangan. U o‘z xizmati evaziga 1 000 dollarni olgan vaqtida ashyoviy dalillar bilan ushlangan.
Departamentning Zarafshon shahar bo‘limi tomonidan IIB xodimlari bilan hamkorlikda o‘tkazilgan tezkor tadbirda, I.X. ismli shaxs fuqaro D.Sh.ning ishonchiga kirib, uni haydovchilik guvohnomasini olish uchun bo‘lib o‘tadigan imtihondan o‘tkazib qo‘yish evaziga 600 dollarni olgan vaqtida ushlangan.
Shu kabi, Departament hamda DXXning Sirdaryo viloyati boshqarmalari tomonidan o‘tkazilgan tezkor tadbirda esa S.K. ismli shaxs fuqaro S.O.ga yuqori lavozimda ishlovchi tanishlari yordamida 550 dollar evaziga haydovchilik guvohnomasini olish uchun bo‘lib o‘tadigan imtihondan o‘tkazib qo‘yishini aytib, 500 dollar va 600 ming so‘mni olgan vaqtida ashyoviy dalillar bilan ushlangan.
Departamentning Qarshi shahar bo‘limi tomonidan DXX xodimlari bilan hamkorlikda o‘tkazilgan tezkor tadbirda esa, T.A. ismli shaxs fuqaro Sh.U.ga yuqori lavozimda ishlovchi tanishlari yordamida haydovchilik guvohnomasini olish uchun bo‘lib o‘tadigan imtihonlarga qatnashmasdan haydovchilik guvohnomasi olib berish evaziga 400 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan. May o‘rtalarida bo‘lsa, Farg‘onada 200 dollarga “prava” olib berishni va’da qilgan avtomaktab rahbari ushlangandi.
Izoh (0)