Veolia Energy Tashkent kompaniyasi 1-dekabrdan budjet tashkilotlari va yuridik shaxslar uchun issiqlik taʼminoti narxlarining oshishi kuchga kirishini ma’lum qildi.
Xalq deputatlari Toshkent shahar kengashining 8-noyabrdagi qaroriga ko‘ra, issiqlik energiyasi va issiq suv ta’minoti xizmatlari uchun tartibga solinadigan narxlar (tariflar) 1 Gkal energiya uchun 664 465 so‘m etib belgilanishi ma’qullangan edi (amaldagi tarif 397 212 so‘m/Gkal).
Tadbirkorlar va aholi uchun tariflar:
- aholi uchun tarif o‘zgarishsiz qoladi va u 1 Gkal uchun 91 960 so‘mni tashkil etadi;
- yuridik shaxslar uchun 1,5 baravarga — 1 Gkal uchun 141 737 so‘mdan 212 606 so‘mgacha oshadi;
- budjet tashkilotlari uchun 1,6 baravarga — 1 Gkal uchun 502 067 so‘mdan 801 963 so‘mgacha oshadi.
“Gazeta.uz”ning yozishicha, tariflar o‘rtasidagi farq Toshkent budjetidan (baʼzan respublika budjetidan) subsidiyalar hisobidan qoplanadi, yaʼni narxlar ko‘tarilishi fuqarolar va tadbirkorlik subyektlariga, shu jumladan, bilvosita — ularning soliqlari hisobiga taʼsir qiladi. 2023-yilda issiqlik taʼminoti korxonalarining yo‘qotishlarini qoplash uchun davlat budjetidan 1,8 trillion so‘m, 2024-yilda esa 4,5 trillion so‘m ajratilishi rejalashtirilgan. Issiqlik taʼminoti tarmog‘i va jamoat transporti uchun to‘lovlar miqdorining keskin oshishini 1-oktyabrdan gaz va elektr energiyasi narxi oshgani, shu sababli issiqlik elektr stansiyalari va avtobuslar yoqilg‘ini oshirilgan narxlarda xarid qilayotgani bilan izohlash mumkin.
Izoh (0)