Тошкент, Навоий, Сирдарё ва Қашқадарё вилоятларида ҳайдовчилик гувоҳномаларини олиб беришни ваъда қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Янгийўл шаҳар бўлими томонидан ўтказилган тезкор тадбирда Ж.Д. исмли шахс фуқаро А.Й.га ўзини гўёки Олмалиқ шаҳар ЙҲХБ ходими сифатида таништириб, унга ўқув машғулотларига қатнашмасдан танишлари ёрдамида ҳайдовчилик гувоҳномасини олиб беришни ваъда қилгани аниқланган. У ўз хизмати эвазига 1 000 долларни олган вақтида ашёвий далиллар билан ушланган.
Департаментнинг Зарафшон шаҳар бўлими томонидан ИИБ ходимлари билан ҳамкорликда ўтказилган тезкор тадбирда, И.Х. исмли шахс фуқаро Д.Ш.нинг ишончига кириб, уни ҳайдовчилик гувоҳномасини олиш учун бўлиб ўтадиган имтиҳондан ўтказиб қўйиш эвазига 600 долларни олган вақтида ушланган.
Шу каби, Департамент ҳамда ДХХнинг Сирдарё вилояти бошқармалари томонидан ўтказилган тезкор тадбирда эса С.К. исмли шахс фуқаро С.О.га юқори лавозимда ишловчи танишлари ёрдамида 550 доллар эвазига ҳайдовчилик гувоҳномасини олиш учун бўлиб ўтадиган имтиҳондан ўтказиб қўйишини айтиб, 500 доллар ва 600 минг сўмни олган вақтида ашёвий далиллар билан ушланган.
Департаментнинг Қарши шаҳар бўлими томонидан ДХХ ходимлари билан ҳамкорликда ўтказилган тезкор тадбирда эса, Т.А. исмли шахс фуқаро Ш.У.га юқори лавозимда ишловчи танишлари ёрдамида ҳайдовчилик гувоҳномасини олиш учун бўлиб ўтадиган имтиҳонларга қатнашмасдан ҳайдовчилик гувоҳномаси олиб бериш эвазига 400 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)