Sirdaryo viloyatida 500 dollarga haydovchilik guvohnomasi olib berishni vaʼda qilgan shaxs qo‘lga olindi, deb xabar beradi Bosh prokuratura huzuridagi departament.
Qayd etilishicha, departamentning Sayxunobod tuman bo‘limi tomonidan tezkor tadbir o‘tkazilgan. Tadbirda D.A. ismli shaxs fuqaro J.T.ga tanishlari yordamida 500 dollarga haydovchilik guvohnomasini olib berishni vaʼda qilib, shundan 200 dollarini olib, qolgan 300 dollarni olgan vaqtida ashyoviy dalillar bilan ushlangan.
Shu kabi, Departamentning Qo‘qon shahar bo‘limi tomonidan o‘tkazilgan tergovga qadar tekshiruvda, “B.A.” MCHJ shaklidagi avtomaktab rahbari B.R. fuqaro G.K.ni haydovchilik guvohnomasi olish uchun bo‘ladigan nazariy va amaliy imtihonlardan o‘tkazib qo‘yishga yordam berishi evaziga 200 dollarni firibgarlik yo‘li bilan qo‘lga kiritgani aniqlangan. B.R.ning ushbu pullarni qaytargani protsessual tartibda rasmiylashtirilgan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Aprel oxirlarida Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan.
Izoh (0)