“Mehridaryo” loyihasiga Toshkent viloyati, Toshkent tumanida yashovchi Raʼno Abdurazzoqova murojaat qilib, 11 yoshdagi o‘g‘lini davolash uchun xalqdan yordam so‘radi.
— Oilada ikki farzandim bor. Afsuski, o‘g‘illarimning sog‘lig‘ida muammo bor. To‘ng‘ich o‘g‘lim Kamoliddin astma bilan, kenjam Fazliddinning buyragida o‘simta aniqlangan. Uch yoshida Fazliddin peshob chiqarolmay qoldi. Tekshirtirsak, buyragida saraton o‘simtasi borligi aniqlandi.
Juda og‘ir jarrohlik amaliyotini boshdan kechirdi. Chilonzor tumanida yashardik, uyni sotib, Toshkent viloyatidan arzonroq uy sotib oldik. Pulning qolganini esa operatsiya uchun sarflagandik. O‘g‘limning ahvoli ancha yaxshilanib qolgandi, ammo shu yilning yoz oyida yaxshi yurolmay “Oyog‘im og‘riyapti” dedi.
Ortoped shifokorlarga ko‘rsatsam, oyog‘ining to‘piq qismida ortiqcha suyak o‘sganini, uni jarrohlik yo‘li bilan olib tashlamasa, keyinchalik bola umuman yurolmay qolishini aytishdi. Majbur yana umumiy narkoz oldirib, operatsiya qildirdik. Ammo uning tanasida saratonga moyillik bor, yana kasalligi rivojlanishidan qo‘rqaman.
O‘g‘lim sentyabr oyidan buyon maktabga borgani yo‘q, chunki u yaxshi yurolmayapti. O‘n bir yoshdagi o‘g‘lim ikki yirik operatsiyani boshdan kechirdi, o‘simtaga qo‘shib bir buyragi ham olib tashlangan. Onkolog shifokorlar operatsiyadan keyin kasallik hujayralari rivojlanmasligi uchun belgilangan dori-darmonlarni qabul qilishi kerakligini aytishyapti. Dorilar juda qimmat, hammasini chet elga buyurtma berib keltirish kerak.
O‘zim bog‘chada, turmush o‘rtog‘im esa Suvsozda ishlaydi. Afsuski, ikkimizning ham sog‘ligimiz yaxshi emas. Ammo o‘zimiz uchun emas, farzandim uchun yordam so‘rashga majburman. Chunki bolam katta inson ham ko‘tarolmaydigan operatsiyalarni boshdan kechirdi. Hozir ahvoli yaxshi, ammo unda saraton rivojlanish xavfi juda yuqori. Iltimos, bizga yordam beringlar.
Fazliddin Abdurazakovga xayriga qilishni istasangiz,
8600 0610 0995 1863 (Abdurazakova Rano)
Murojaat uchun: +99897 772-56-37
Izoh (0)