“Rossiyaga oyoqda borib, shol bo‘lib qaytdim” — 26 yoshda nogironga aylangan qiz davolanishi uchun xalqdan yordam so‘ramoqda (video)

“Mehridaryo” loyihasiga toshkentlik Farangiz Azimboyeva murojaat qilib, davolanishi uchun xalqdan yordam so‘radi.

— Koronavirusga qarshi olgan vaksina sabab menda giyena barre kasalligi  paydo bo‘ldi. Shifokorlarning aytishicha, bu holat mingtadan bittada uchrar ekan. Aslida men Rossiyada Kemensk-Uralskiy universitetida tahsil olardim. 2021-yilning oktyabr oyida onamni ko‘rish uchun Toshkentga keldim va ketishimdan oldin emlanishim kerakligini aytishdi. To‘g‘risi, o‘shanda bitta ukol sabab hayotim butunlay o‘zgarib ketishini bilmagandim.

Emlangandan keyin Rossiyaga ketdim va oradan besh oy o‘tib, ahvolim og‘irlashishni boshladi. Oyoq-qo‘limning harakati cheklandi, immunitetim birdan tushib ketdi. Rossiyaga oyoqda borib, shol bo‘lib qaytdim. Toshkentga qaytib kelganimdan keyin 2022-yili menga giyena barre tashhisini qo‘yishdi. Ikki marta immunitetni tiklovchi eng qimmat dorilarni ham organizmimga yuborishdi.

Undan keyin Rossiyadagi “Yantar” reabilitatsiya markaziga borib davolanib keldim. U yerdagi muolajalar yaxshi samara berib, belim va qo‘lim biroz harakatlana boshladi, ammo kuch yo‘q. Hatto sochimni ham taray olmayman. Oyoqlarim esa butunlay harakatsiz.

Yolg‘iz onam bilan yashaymiz. U 65 yoshda, ammo meni xuddi chaqaloqdek parvarishlaydi.“Yantar” reabilitatsiya markazidagi shifokorlar 4-5 oy tinimsiz davolansang, ahvoling yaxshilanadi, deyishyapti.

Yaxshi insonlar yordamingizga muhtojman, oyoqqa turishim uchun yordam beringlar, — deydi Farangiz Azimboyeva.

Farangiz Azimboyevaga xayriya qilishni istasangiz,

8600 0610 5599 7091

(Azimbayeva Farangiz)

Murojaat uchun: +998 99 899 59 04