O‘zbekistonda ishsiz xotin-qizlarni ish bilan ta’minlaganlik uchun navbatdagi davlat granti ajratiladi. Oila va xotin-qizlar qo‘mitasi axborot xizmati rahbari Saodat Boymirzayeva buning uchun tadbirkorlar 25-noyabrgacha tegishli mahalla fuqarolar yig‘inlariga loyiha takliflarini va hujjatlarini taqdim etishlari mumkinligini aytdi.
Davlat granti xotin-qizlar bandligini taʼminlash, salomatligini mustahkamlash hamda ularni kasbga o‘qitish faoliyati bilan bog‘liq bitta ijtimoiy loyiha doirasida 20 nafargacha xotin-qizlarning doimiy bandligini taʼminlash maqsadida tadbirkorlik subyektlariga har 1 nafar bandligi taʼminlanadigan ishsiz xotin-qiz uchun 3 million so‘mdan oshmagan miqdorda ajratiladi.
Mahalla fuqarolar yig‘inlari orqali taqdim etilgan loyihalar 28-noyabrgacha tuman-shahar ishchi guruhlari tomonidan Vazirlar Mahkamasining qarori bilan tasdiqlangan Nizom talablariga muvofiq ko‘rib chiqiladi.
30-noyabrgacha hududiy boshqarmalar tomonidan Oila va xotin-qizlar qo‘mitasiga davlat granti ajratilishi so‘ralgan buyurtmanoma yuboriladi. Loyihalar 15-dekabrgacha Respublika komissiyasi tomonidan ko‘rib chiqiladi.
Komissiya qaroriga ko‘ra 2023-yil 20-dekabrgacha Oila va xotin-qizlarni qo‘llab-quvvatlash davlat jamg‘armasi mablag‘lari hisobidan navbatdagi davlat granti ajratiladi.
O‘zbekistonda bandligi ta’minlanadigan har bir nafar ishsiz xotin-qiz uchun tadbirkorlarga 3 million so‘mgacha davlat granti ajratish 2022-yildan boshlangandi.
Izoh (0)