O‘zbekistonda sanʼatkorlarga uy olishda yordam berilishi haqida xabarlar tarqalib, turli muhokamalarga sabab bo‘ldi. Madaniyat vazirligi mazkur xabarlar yuzasidan tushuntirish berdi.
Unga ko‘ra, “Madaniy faoliyat va madaniyat tashkilotlari to‘g‘risida”gi qonuning 3-moddasida o‘z kasbiy faoliyatini madaniyat tashkilotlarida amalga oshiruvchi jismoniy shaxs madaniyat xodimi, kasbiy yoki nokasbiy asosda (havaskorlik asosida) madaniy faoliyatning bir yoxud bir necha yo‘nalishi bo‘yicha ijodiy faoliyat bilan shug‘ullanuvchi jismoniy shaxs ijodkor ekanligi ko‘rsatib o‘tilgan.
Madaniyat va sanʼat sohasi vakillari, ijodkorlar, shuningdek, ushbu sohada faoliyat olib borayotgan professor-o‘qituvchi va xodimlarni moddiy qo‘llab-quvvatlash hamda ularning yashash sharoitlarini yaxshilash “2022—2026-yillarga mo‘ljallangan yangi O‘zbekistonning taraqqiyot strategiyasi”ning 76-maqsadida belgilangan.
Shu bilan birga, prezidentning 2022-yil 2-fevraldagi PQ–112-son qarori 11-bandida Qoraqalpog‘iston Vazirlar Kengashi, viloyatlar va Toshkent shahar hokimliklari qarori bilan mahalliy budjetning qo‘shimcha manbalari hisobidan ushbu hududda uzoq yillar samarali faoliyat olib borgan madaniyat va sanʼat sohasi vakillariga hamda isteʼdodli yosh ijodkorlarga ipoteka krediti asosida sotib olinayotgan uy-joy qiymatining 50 foizi miqdorida, biroq prezidentning 2021-yil 9-dekabrdagi farmoniga muvofiq belgilangan uy-joy hisoblangan qiymatining 50 foizidan yuqori bo‘lmagan miqdorda subsidiya berilishi belgilab qo‘yilgan.
Bugungi kunda madaniyat va sanʼat sohasida 36 mingdan ortiq xodimlar faoliyat olib boradi. Ulardan 850 nafardan ziyodi oliy taʼlim tizimida, 2500 nafari o‘rta va o‘rta maxsus taʼlim tizimida, 12 ming nafardan ortiq o‘qituvchilar bolalar musiqa va sanat maktablarida, 9 ming nafardan ko‘proq murabbiylar madaniyat markazlarida, 6 ming nafardan ortiq ijodkorlar teatr va sirk sohasida, 2 900 nafardan ortiq sanʼatkor va ijodkorlar konsert-tomosha sohasida mehnat qilib kelmoqda.
“Xalqaro miqyosdagi ko‘rik-tanlovlar va festivallarda yuqori o‘rinlarni egallab, Vatanimiz nomini ulug‘lashga hamda madaniyat va sanʼat sohasi rivojiga katta hissa qo‘shayotgan madaniyat va sanʼat sohasi vakillarining aksariyati uzoq yillardan buyon oilaviy yotoqxonalarda Internet saytlari va ijtimoiy tarmoqlarda iddao qilinayotganidek, madaniyat va sanʼat sohasi vakillarining hammasi ham bir xilda to‘y-hasham, tug‘ilgan kun va yoki boshqa tadbirlarda xizmat ko‘rsatish, qo‘shimcha daromad topish imkoniyatiga ega emas. Lekin shunga qaramay, ular o‘z kasbiga mehr qo‘yib, fidoyilik bilan mehnat qilmoqda.
Internet saytlari, ijtimoiy tarmoq sahifalari, rasmiy nashrlar portalida madaniyat va sanʼat sohasi vakillari shaʼni va qadr-qimmatini kamsitish yoki yolg‘on, sharmanda qiluvchi uydirmalarni tarqatish kabi huquqbuzarliklarga yo‘l qo‘ymagan holda qonunchilik hujjatlari yuzasidan asoslangan taklif va mulohazalar bildirilishini so‘rab qolamiz.
Zero madaniyat va sanʼat sohasi xodimlari ham O‘zbekiston Respublikasi Konstitutsiyasi va boshqa qonunchilik hujjatlari bilan qo‘riqlanadigan shaxsiy daxlsizlik huquqlaridan erkin foydalanuvchi O‘zbekiston Respublikasi fuqarolari hisoblanadilar.
Vazirlik har doim ochiqlik, shaffoflik va so‘z erkinligini qo‘llab-quvvatlab kelgan. Shunga ko‘ra, sohaga doir o‘zingizni qiziqtirgan zaruriy maʼlumotlarni vazirlik matbuot xizmati yoki rasmiy veb-saytidan olishingiz mumkin”, deyiladi vazirlik xabarida.
Izoh (0)