“Svetoforni qulatgan paytlarimiz ham bo‘ldi”. Mexanizatorlikni egallagan farrosh ayollar hikoyasi (video)

Namanganda 5 nafar ayoldan iborat mexanizatorlar jamoasi mavsum davomida 100 tonnadan ortiq paxta terishga ulgurdi. Ularning barchasi bu kasbni egallagunga qadar korxonaning xo‘jalik bo‘limida ishlayotgan farroshlar edi, deya hikoya qiladi ayollar bilan hamsuhbat bo‘lgan «Daryo” muxbiri Azizbek Abduvaliyev.

 “Ustozlardan dakki eshitib, oxiri uddalab ketdik”

Uchqo‘rg‘on tumanida “Uzteks” korxonasi xo‘jalik bo‘limida farrosh bo‘lib ishlardik. Korxona rahbariyati bizni chaqirib, mexanizatorlikka o‘qishni tavsiya qildi. To‘g‘risi, bu biz uchun kutilmagan taklif bo‘ldi. Oldin o‘zimiz muhokama qildik, keyin oila aʼzolarimiz bilan maslahatlashdik. Tanlov asosida shu kasbga uquvi borlar saralab olindi.

Uch oy davomida ham o‘qidik, ham amaliyot bo‘ldi. Traktor, kombayn boshqardik. Qiyinchiliklarni aytmang: tormoz o‘rniga gazni bosib yuborgan, beton ariqqa qarab ketib qolgan, hatto svetoforni urib yuborgan paytlarimiz bo‘ldi. Buning uchun yaxshigina dakki ham eshitdik.

Ustozlarimizning qo‘llab-quvvatlashi, uydagilarning daldasi bilan 15-sentyabrdan dalaga chiqdik. Kombayn zamonaviy, boshqarish uchun juda qulay. Kabinasida barcha sharoitlar, hatto konditsioner ham bor, ishlab charchamaysiz.

Tursunoy Oxunovaning izdoshlari

Mavsum davomida har birimiz mashinalarimizda o‘rtacha 25 tonnadan paxta terdik. Rag‘bat ham shunga yarasha bo‘ldi: oldinlari, farrosh sifatida ishlab yurganimizda 2 million so‘mdan maosh olgan bo‘lsak, mexanizatorlikda bu ko‘rsatkich 5 million so‘mga chiqdi. Viloyat hokimining o‘zi dalaga kelib, faoliyatimizdan xursand bo‘lib, har birimizga televizor sovg‘a qildi.

Televideniyedan kelib, biz haqimizda ko‘rsatuv va lavhalar qilib ketishganidan so‘ng mashhur bo‘lganimizni ko‘rsangiz. Ishdan qaytayotsak, “ana, Tursunoy Oxunovaning izdoshlari kelishyapti” deyishadi. Bozor-o‘charga chiqsak ham taniydigan bo‘lishdi. Oldimizga qancha ayollar kelib, “biz ham o‘qisak, o‘rgansak bo‘ladimi?” deb maslahat so‘rab ketishdi.

Shu bahona avtomobil minishni ham o‘rganib oldik. Endi o‘zimiz bemalol mashina olishimiz ham mumkin.

“Traktor va kombayn boshqarishni hozirdan sog‘inyapmiz”

Brigadada 5 nafar ayol bo‘lsak, shundan uch nafarining otasi traktorchi bo‘lgan. Biz bu kasbning mashaqqatlarini ko‘rib katta bo‘lganmiz desak ham bo‘ladi. Masalan, Gulnora Akramovaning otasi 20 yil traktor mingan, ikki akasi ham traktorchi. Odina Jo‘rayevaning otasi esa 40 yil davomida traktor boshqargan, o‘zi esa oiladagi 7 nafar qizning kenjasi.

Buoysha Isroilova ham otasining traktorida bog‘cha-maktabga qatnab katta bo‘lgan. Ularning oilalari mexanizatorlikni egallab, ota kasbini davom ettirayotgan yaqinlaridan qanchalik faxrlanishini tasavvur ham qilolmaysiz.

Paxta yig‘im-terim mavsumi ham yakunlandi va biz yana eski ish joyimizga qaytdik. Ishoning, traktor va kombaynlarimizni hozirdan sog‘inishni boshladik. Kelgusida safimiz yanada kengayadi, mexanizatorlik esa doimiy kasbimizga aylanadi, degan umiddamiz.