O‘zbekistonda birinchi marta 2023-yil 1-dekabrdan boshlab Olmaliq arxitektura-qurilish texnikumida ko‘p qavatli uylarga xizmat ko‘rsatuvchi ustalarni o‘qituvchi ikki yillik dastur ochilmoqda. Unga bir guruh o‘rganuvchilar tanlab olingan.
“Zamonaviy ish beruvchilar talablari va xorijlik ekspertlar tavsiyalari asosida tuzilgan o‘quv dasturi ikki yil ichida 4-malaka darajasiga ega xaus master, ya’ni ko‘p qavatli uylarda bir nechta muhim ustachilik ishlarini qila oluvchi mutaxassis tayyorlaymiz. Dasturga 100 foiz davlat grant ajratgan. Bitiruvchilar nafaqat Olmaliq va uning atrofidagi hududlar, balki Toshkent, hatto chet tilni egallagan bo‘lsa xorijda ham ushbu o‘ta muhim kasb bilan shug‘ullanishi mumkin bo‘ladi”, – deydi Olmaliqdagi texnikum direktori Sohiba Mirzakarimova.
Bu haqda ushbu tashabbus hayotga tatbiq qilinishiga sababchi bo‘lgan Yevropa Ittifoqining Promhouse loyihasi yakunlariga bag‘ishlangan konferensiyada ma’lum qilindi. Xalqaro anjumanda Yevropa Ittifoqining Qozog‘iston va O‘zbekistondagi vakolatxonalari mas’ullari, Promhouse loyihasi hamkor davlatlarining ixtisoslashgan vazirlik va idoralari vakillari, soha mutaxassislari, ekspertlar ishtirok etdi.
2020-2023 yillarda amalga oshirilgan loyiha davomida professional ta’lim muassasalarida soha uchun kerakli kasblarga o‘qitish yo‘lga qo‘yildi, balki Training of Trainers (ToT) ta’lim dasturi amalga oshirildi. U 256 akademik soatga mo‘ljallangan bo‘lib, o‘qituvchilar 9 ta mamlakat Germaniya, Qozog‘iston, O‘zbekiston, Moldova, Belarus, Ukraina, Latviya, Litva va Estoniyadan jalb qilindi. Dasturda loyihaning hamkor mamlakatlari uy-joy xo‘jaligining 1300 ga yaqin mutaxassislari ishtirok etdi. Trening “uy-joylarni boshqarish”, “raqamlashtirish”, “turar joy binolarida energiya samaradorligi”, “uy ustasi”, “kasbiy tayyorgarlikni tashkil etish”, “kommunikatsiya” modullar bo‘yicha o‘tkazildi.
Loyihaning ko‘plab ishtirokchilari mintaqaviy tajriba almashishni (3 ta konferensiya, Qozog‘iston va O‘zbekistonga 2 ta ta’lim safari, Germaniya va Estoniyaga 2 ta ta’lim safari) ijobiy e’tirof etdi. Loyiha uy-joy sohasida tajriba almashish Markaziy Osiyo uchun qanchalik muhimligini ko‘rsatgani alohida ta’kidlandi.
“Tomdan chakki o‘tishi, suv va kanalizatsiya quvurlaridagi nosozliklar, lift ishlamay qolishi. Ko‘p qavatli turar-joy binolarida kuzatiladigan shu kabi holatlar uylarni boshqaruvchi kompaniyalar tomonidan bartaraf qilinishi kerak. Sobiq sovet mamlakatlarida bunday shirkatlarni aholi vakillaridan iborat jamoa yuritadi”, – deydi Sharqiy Yevropada Uy-Joy Tashabbusining (IWO) (Germaniya) Markaziy Osiyo bo‘yicha loyiha direktori Larisa Shrekkenbax. Yevropa Ittifoqining kuni kecha yakunlangan uch yillik Promhouse loyihasiga konsultantlik qilgan germaniyalik ekspertga ko‘ra, muammolar va ziddiyatlar kam bo‘lishi, aholi qulay va tashvishsiz uyda yashashi uchun kommunal xo‘jaligi xodimlari professional bo‘lishi, o‘z vazifasini bajarish uchun maxsus bilim va kompetensiyalarga ega bo‘lishi zarur.
“Bu kabi Yevropa loyihalari ko‘proq bo‘lishi kerak. Promhouse nafaqat Germaniyadan, balki 90-yillarda uy-joy fondida O‘zbekistondagiga o‘xshash holatda bo‘lgan Sharqiy Yevropa mamlakatlaridan tajriba va nou-xaularni o‘zlashtirish imkoniyatini beradi”, – deydi O‘zbekistondagi ko‘p qavatli uylarga oid eng yirik assosiatsiya bo‘lmish Uyushma.uz rahbari Rahima Ortiqova. – “Bu sohada amalga oshiriladigan ishlar hali ko‘p. Mavjud ehtiyoj va O‘zbekistondagi mutasaddilarning xayrixohligi, xorijlik hamkorlarning qo‘llovi bilan har bir inson uchun eng muhim mavzu – uylarimiz ahvoli yaxshiligiga xizmat qiladigan mutaxassislarni tayyorlashda davom etamiz”.
Loyiha yakunlariga bag‘ishlangan konferensiyada mutaxassislar ko‘p qavatli uylarni boshqarish sohasidagi kadrlar masalasi yo‘laklardagi eng faol qo‘shnilarga mas’uliyatni yuklab qo‘yish orqali emas, texnikum va universitetlarda ularni tizimli tayyorlash, salohiyatni oshiruvchi o‘quv dasturlari orqali hal qilinishi kerakligini alohida ta’kidladi.
Izoh (0)