“Dizayn” jamoasi aʼzosi Dilshod Musabekov “Daryo”ning YouTube dagi kanaliga bergan intervyusida “Quvnoqlar va zukkolar”dagi faoliyatini yakunlab, bozorda sotuvchilik qilgani, katta daromad topsa-da, ishidan qoniqmagani haqida so‘zlab berdi.
— “Quvnoqlar va zukkolar”dagi faoliyat uzoqqa cho‘zilmaydi. Institutni tugatib, finalda g‘olib bo‘lganidan keyin hech qanday marra yo‘q. Keyin unda ishtirok etib, ro‘zg‘or ham tebratib bo‘lmaydi. Inson ijodni qanchalik yaxshi ko‘rmasin, oilali bo‘lgandan keyin ro‘zg‘orni tebratish haqida o‘ylarkan. Bir do‘stimning taklifiga ko‘ra “O‘rikzor” bozorida do‘kon olib, tadbirkorlik bilan shug‘ullanganmiz. Bir kunda yarimta mashinaning pulini topadigan kunlarim ham bo‘lgan. Ishim juda oddiy edi, mahsulotlarni olib, qayta sotardim. Ora-chorada odamlar tanib, “Siz falonchida chiqardingiz-a?” deb eslab qo‘yishardi. Daromadim yuqori bo‘lsa-da, qilayotgan ishimdan zavqlanmasdim. Ko‘pchilik meni “Dizayn” jamoasining asoschisi deb biladi. Ammo men jamoaga eng so‘nggi qo‘shilgan aʼzoman, desam ham bo‘ladi. O‘shanda jamoaga DJ sifatida taklif qilishgan. Tan olaman, jamoadagi hech birimiz sanʼat sohasida tahsil olmaganmiz. Saʼdulla stilist, Qobil mashina narx-navosini chiqaradigan mutaxassis, Abdurahmon brigadir, men esa tadbirkorlik bilan shug‘ullanardim. Xullas, kelishib yo sanʼatni yoki hamma o‘z ishini davom ettirishni tanlashimiz kerak edi. Eng qizig‘i, jamoa rivojlanmaguncha boshqa ish bilan ham shug‘ullana olmasdik. Shu bois ham hammamiz bir necha yil moliyaviy tomondan qiynalganmiz, — deydi Dilshod Musabekov.
- Ushbu havolaga kiring va to‘lib videoni tomasha qiling!
Intervyuda Dilshod Musabekov 2012-yilgi konsertdan bir kun avval otasi vafot etgani va janozadan so‘ng katta sahnaga chiqishga majbur bo‘lgani haqida so‘zlab berdi.
— Juda qiyin vaziyat bo‘lgan. Konsertdan bir kun avval, aynan otam olamdan o‘tgan kuni ertalab yaxshi kayfiyatda barchamizni duo qilgandilar. Elmurod Haqnazarov uyimizda qolib, hammamiz birgalashib nonushta qilgandik. Otam sanʼatkor bo‘lmasa-da, faoliyatimizga eʼtiborsiz emasdi.
Hatto, o‘sha kuni ham “Bolalarim sahnaga chiqqanilarda muxlislar kelsa ko‘ksidan itarmanglar. Muxlis shunaqaki, olqish bilan ko‘kka ko‘taradi, istasa bir zumda yerga ham tushiradi. Bundan keyin o‘nglanib olish qiyin bo‘ladi”, deb nasihat qilgandilar.
Afsuski, bu uchrashuv otam bilan vidolashuv onlarimiz ekan. Repetitsiyaga borganman va shu bilan kechga mayitlarining ustiga kelganman. U paytlar internet u qadar rivojlanmagandi, muxlislar otamning o‘limidan xabardor bo‘lishmagan. Yodlaganlarimni sahnaga chiqib aytib berganman, ammo yig‘lab turib odamlarni kuldirishim juda qiyin bo‘lgan, — deydi Dilshod Musabekov.
Dilshod Musabekov ustoz sanʼatkorlardan ko‘p narsalarni o‘rgangani va o‘zi bugungi kunda yoshlarga ulardek munosabatda bo‘lolmayotgani haqida ham to‘xtalib o‘tdi.
— Rahmatli ustozimiz Obid Asomov menga qo‘ng‘iroq qilib “Nega ijodga kelmayapsan?” deb koyib qo‘yardi. Repetitsiya uylarida bo‘lardi. Obid Asomov o‘zbek qiziqchiligining eng ko‘zga ko‘ringan vakili, men uning yonida kimman?
Ammo hamisha ijodimizga eʼtibor berib, yordam berardi. Hozir o‘sha voqealarni eslasam, ustozlar menga yordam berganchalik menning yoshlarga nafim tegyaptimi deb ko‘p o‘ylayman.
Hozir ham “ustoz-ustoz” deb mulozamat qiladiganlar ko‘p. O‘zimni ustozlik darajasiga yetgan deb hisoblamayman, ularning ham harakati soxtadek tuyuladi. “Ustoz emas, aka bo‘lay, siz uka bo‘ling”, deyman, — deydi Dilshod Musabekov.
- Ushbu havolaga kiring va to‘lib videoni tomasha qiling!
Izoh (0)