“Ikki yil imtihondan yiqilganman” — aktrisa Yulduz Rajabova tarjimon bo‘lolmagani va rep aytish niyati borligi haqida gapirdi

Aktrisa Yulduz Rajabova “Hay, mayli podcast”ga bergan intervyusida ingliz tili tarjimoni bo‘lishni istagani, ammo bu borada omad kulib boqmagani va uni har qanday vaziyatda onasi qo‘llab-quvvatlashi haqida so‘zlab berdi.

— Bolalikdan raqs sanʼatiga qiziqqanman, ammo tarjimon bo‘lish xohishi ustunlik qilgan. Ingliz tilini o‘rganishga jiddiy kirishganman, ammo ikki yil Jahon tillari universitetiga hujjat topshirib kirolmaganman. Uchinchi yil O‘zbekiston davlat sanʼat va madaniyat institutiga hujjat topshirish fikri tug‘ilgan. Albatta, qarshiliklar bo‘lgan, ammo onam hamisha qo‘llab-quvvatlab, imtihonlarga o‘zi olib kelgan. Har qanday inson qo‘llab-quvvatlaydigan odamga muhtojlik sezadi. Biror ishni qilishda ikkilanib tursangiz, o‘sha insonning ishonchi katta kuch beradi. Aktrisa bo‘lishimga onamning ishonchi yuqori bo‘lgan.

Hozir ham ingliz tilini bilaman va o‘rganishda davom etyapman, — deydi aktrisa Yulduz Rajabova.

Aktrisa bolalikdan qo‘shiq aytishni yaxshi ko‘rishi, kun kelib bu boradagi orzularini ham amalga oshirishi haqida ham aytib o‘tdi.

— Rep yo‘nalishidagi qo‘shiqni aytishga qiziqaman. Bolalikdan qo‘shiqchilikka ishtiyoqim baland bo‘lgan. Lekin aynan sof rep yo‘nalishida qo‘shiq aytishni orzu qilaman, — deydi aktrisa.

Aktrisa Netflix tomonidan suratga olinayotgan Amir Temur haqidagi filmda suratga tushayotgani haqidagi xabarlar yashin tezligida tarqalgandi. Ammo aktrisa suhbat davomida filmni Netflix olish yoki olmasligi nomaʼlum ekanini aytib o‘tdi.

— Umid qilamiz, duo qilib turinglar. Chunki Netflix filmni olish olmasligini hali aniq emas, — deydi aktrisa.