“Daryo”ning YouTube’dagi kanalida “Dizayn” kulgi jamoasi aktyori Dilshod Musabekov bilan suhbat tashkil etildi. U yangi konsert bannerlarida nega Elmurod Haqnazarov, Sitora Farmonova va Nazokat ko‘rinmayotganing sabablarini aytib o‘tdi.
— Bu masala bilan bog‘liq savollarni ko‘p eshityapman. “Elmurodni chiqishtirmadilarmi? Nazokat va Sitora endi ishtirok etmaydimi?” degan savollarni ko‘p eshityapman. Xavotir olishmasin, tarkib o‘zgargani yo‘q. Biz mashhur “Jumanji” asarini yangicha talqinda sahnaga olib chiqmoqchimiz. Shu bois Elmurod boshchiligidagi boshqa ijodkorlar uchun alohida banner tayyorlandi. “Dizayn”ni kuzatadigan muxlislar yaxshi bilishadi. Hech bir sahna ko‘rinishi takrorlanmaydi. Yaʼni uning davomi bo‘lishi mumkin, ammo hech qachon takror hazillardan foydalanmaymiz. “Jumanji” ham bu yil yangicha talqinda sahnalashtirilmoqda, — deydi Dilshod Musabekov.
Dilshod Musabekov sanʼatkorning hayotigacha aralashayotgan va ijtimoiy tarmoqlarda ochiqdan ochiq haqorat qilayotgan insonlar haqida gapirib o‘tdi.
— Aslida hammaga birdek yoqishning iloji yo‘q. Bitta konsertni ham 100 ta tomoshabin ko‘rsa, o‘shanda ikkitasigina “yoqmadi” desa, ularning fikriga eʼtibor qaratadigan bo‘lib qolganmiz. Ijtimoiy tarmoqlardagi haqoratli gap-so‘zlar haqida ham alohida gapirib o‘tmasam bo‘lmaydi. Innovatsion zamon degani o‘zbek ekanligini unutib, birovning aybini ochib tashlash kerak degani emas-ku. Hozirgi ayrim kuzatuvchilar sanʼatkorning ijodini kuzatishmayapti. Hatto sanʼatkorlarning shaxsiyatigacha aralashib, tanqid qilishga usta bo‘lib qolishgan. Kimga erga teggani, nima qilayotgani bilan nima ishing bor, deydigan odam topilmayapti.
Yaqinda bir kuzatuvchining yozgan gapidan dilim og‘ridi. Ukam aviatsiya sohasida ishlaydi. Bir necha yil o‘qigan, tajribali mutaxassis. U ommaga o‘zini ko‘rsatishni istamaydigan yigit. Undan faxrlanib, Samarqand aeroporti haqida tayyorlagan videosini ijtimoiy tarmoqqa joylasam, bittasi “ikkoving ham haromisanlar”, deb yozdi. Men yuztadan bittasini misol keltirib aytyapman. Biz falon-falonchiyevning bolalari emasmiz. Oddiy oshpaz Komil akaning o‘g‘illarimiz. Ukam ham, men ham bugungi kungacha faqat mehnat orqali erishganmiz. Buni bilmay turib, shaxsiyatga tegish qanchalik to‘g‘ri. To‘g‘ri, bunda sanʼatkorlarning aybi ham bor. Ijtimoiy tarmoqlar faollashganidan keyin muxlis va sanʼatkor o‘rtasidagi chegara buzildi, — deydi Dilshod Musabekov.
Videoni to‘liq holda quyida tomosha qilishingiz mumkin.
Izoh (0)