“Отамни ерга қўйиб, эртаси куни концертда одамларни кулдирганман” — Дилшод Мусабеков “Дизайн”га DJ бўлиб қабул қилингани ва “ёпилган” катта бизнеси ҳақида (видео)

“Дизайн” жамоаси аъзоси Дилшод Мусабеков “Дарё”нинг YouTube даги каналига берган интервьюсида “Қувноқлар ва зукколар”даги фаолиятини якунлаб, бозорда сотувчилик қилгани, катта даромад топса-да, ишидан қониқмагани ҳақида сўзлаб берди.

— “Қувноқлар ва зукколар”даги фаолият узоққа чўзилмайди. Институтни тугатиб, финалда ғолиб бўлганидан кейин ҳеч қандай марра йўқ. Кейин унда иштирок этиб, рўзғор ҳам тебратиб бўлмайди. Инсон ижодни қанчалик яхши кўрмасин, оилали бўлгандан кейин рўзғорни тебратиш ҳақида ўйларкан. Бир дўстимнинг таклифига кўра “Ўрикзор” бозорида дўкон олиб, тадбиркорлик билан шуғулланганмиз. Бир кунда яримта машинанинг пулини топадиган кунларим ҳам бўлган. Ишим жуда оддий эди, маҳсулотларни олиб, қайта сотардим. Ора-чорада одамлар таниб, “Сиз фалончида чиқардингиз-а?” деб эслаб қўйишарди. Даромадим юқори бўлса-да, қилаётган ишимдан завқланмасдим. Кўпчилик мени “Дизайн” жамоасининг асосчиси деб билади. Аммо мен жамоага энг сўнгги қўшилган аъзоман, десам ҳам бўлади. Ўшанда жамоага DJ сифатида таклиф қилишган. Тан оламан, жамоадаги ҳеч биримиз санъат соҳасида таҳсил олмаганмиз. Саъдулла стилист, Қобил машина нарх-навосини чиқарадиган мутахассис, Абдураҳмон бригадир, мен эса тадбиркорлик билан шуғулланардим. Хуллас, келишиб ё санъатни ёки ҳамма ўз ишини давом эттиришни танлашимиз керак эди. Энг қизиғи, жамоа ривожланмагунча бошқа иш билан ҳам шуғуллана олмасдик. Шу боис ҳам ҳаммамиз бир неча йил молиявий томондан қийналганмиз, — дейди Дилшод Мусабеков.

• Ушбу ҳаволага киринг ва тўлиб видеони томаша қилинг!

Интервьюда Дилшод Мусабеков 2012 йилги концертдан бир кун аввал отаси вафот этгани ва жанозадан сўнг катта саҳнага чиқишга мажбур бўлгани ҳақида сўзлаб берди.

— Жуда қийин вазият бўлган. Концертдан бир кун аввал, айнан отам оламдан ўтган куни эрталаб яхши кайфиятда барчамизни дуо қилгандилар. Элмурод Ҳақназаров уйимизда қолиб, ҳаммамиз биргалашиб нонушта қилгандик. Отам санъаткор бўлмаса-да, фаолиятимизга эътиборсиз эмасди.

Ҳатто, ўша куни ҳам “Болаларим саҳнага чиққаниларда мухлислар келса кўксидан итарманглар. Мухлис шунақаки, олқиш билан кўкка кўтаради, истаса бир зумда ерга ҳам туширади. Бундан кейин ўнгланиб олиш қийин бўлади”, деб насиҳат қилгандилар.

Афсуски, бу учрашув отам билан видолашув онларимиз экан. Репетицияга борганман ва шу билан кечга майитларининг устига келганман. У пайтлар интернет у қадар ривожланмаганди, мухлислар отамнинг ўлимидан хабардор бўлишмаган. Ёдлаганларимни саҳнага чиқиб айтиб берганман, аммо йиғлаб туриб одамларни кулдиришим жуда қийин бўлган, — дейди Дилшод Мусабеков.

Дилшод Мусабеков устоз санъаткорлардан кўп нарсаларни ўргангани ва ўзи бугунги кунда ёшларга улардек муносабатда бўлолмаётгани ҳақида ҳам тўхталиб ўтди.

— Раҳматли устозимиз Обид Асомов менга қўнғироқ қилиб “Нега ижодга келмаяпсан?” деб койиб қўярди. Репетиция уйларида бўларди. Обид Асомов ўзбек қизиқчилигининг энг кўзга кўринган вакили, мен унинг ёнида кимман?

Аммо ҳамиша ижодимизга эътибор бериб, ёрдам берарди. Ҳозир ўша воқеаларни эсласам, устозлар менга ёрдам берганчалик меннинг ёшларга нафим тегяптими деб кўп ўйлайман.

Ҳозир ҳам “устоз-устоз” деб мулозамат қиладиганлар кўп. Ўзимни устозлик даражасига етган деб ҳисобламайман, уларнинг ҳам ҳаракати сохтадек туюлади. “Устоз эмас, ака бўлай, сиз ука бўлинг”, дейман, — дейди Дилшод Мусабеков.

• Ушбу ҳаволага киринг ва тўлиб видеони томаша қилинг!