“Dizayn” jamoasi aʼzosi Dilshod Musabekov “Daryo”ga bergan intervyusida yaqin do‘stining ishonchsizlik bildirgani, qoldirilgan konsert haqida eshitib, sog‘lig‘i yomonlashgani va qiyin vaziyatda ularni qo‘llagan insonlardan hamisha minnatdorligi haqida gapirdi.
— Faoliyatimni xonandalik va sozandalikdan boshlaganman. U paytlari yosh ijodkorlarning ishlari kamdan kam hollarda televideniyeda namoyish etilardi. Professional studiyada qo‘shiq aytib, yaxshi klip suratga olib, “Paxtakor” televideniyesiga kelganman. U yerda partadosh do‘stim ishlardi. Diskni qo‘liga berib, “Bor mablag‘imni sarflab klip oldim, iltimos, shuni chiqarishimga yordam ber”, deganman. “Bu yer senga kaptarxona emas, duch kelgan odam chiqavermaydi”, degan. Mana shu gap haligacha esimdan chiqmaydi.
Baʼzi xonandalar davlat va xususiy kanallarini ajratishadi. Yaʼni davlat kanallariga chaqirishsa, mensimay turishadi. Men esa bir necha yil oldin o‘sha yerdan boshimni egib chiqib ketganimni hech qachon esimdan chiqarmayman. Chaqirishsa, xursand bo‘lib boraman, telekanallarni bir-biridan ajratmayman, — deydi Dilshod Musabekov.
“Dizayn” jamoasi aʼzosi Dilshod Musabekov katta qiyinchiliklar bilan konsert bergani, tanilish oson kechmagani haqida gapirdi.
— Jamoa tashkil etilganidan keyin Andijon viloyati Baliqchi tumaniga borganmiz. O‘n uch kun sovuq uyda yashaganimiz hech qachon yodimizdan chiqmaydi. Gaz yo‘qligi uchun tomdan taxtaning payraxalarini olib tushib, bochkaga solib yoqqanmiz. Uy juda tez isib, ammo ko‘p o‘tmay sovib qolardi. Ertalabgacha muzlab qolardik. U paytlarda konsert qo‘yish tartibini yaxshi bilmasdik. Kollejlarga borib, o‘zimizni tanishtirardik va konsert qo‘yish niyatimiz borligini aytardik. Ommaviy tadbirlarni o‘tkazish uchun bir nechta tashkilotlardan ruhsat olish kerakligini bilmagan ekanmiz. “Abdurahmon, hamma o‘zining ishidan kechib, sanʼatni tanladi. Endi har doim shunaqa yuramizmi?” deb yig‘laganman. Bu gaplarimni eshitib, u ko‘ziga yosh olgan.
Keyin eng katta zarbani “Xalqlar do‘stligi” sanʼat saroyida beriladigan konsertga uch kun qolganida olganmiz. Bir tashkilot konsertni o‘tkazib beramiz, degan. Tayyorgarlik ko‘rib, chiptalarni sotib, uch kundan keyin konsert, deb turgan paytimizda oldiga borsak, “Qanaqa konsert? Senlarning konsertingga kim tushadi?” degan. “Endi nima bo‘ladi?” deb Chilonzorda yo‘l chetida Qobil bilan “valerianka” ichib o‘tirganmiz. Shu payt “Dizayn” jamoasining asoschilaridan biri bo‘lgan Shahboz ismli yigit qo‘ng‘iroq qilib qoldi. Vaziyatni bilganidan keyin, “Turing o‘rningizdan, boshingizni ko‘taring. Bu nima o‘tirish?” deb uy manzilini bergan va o‘sha yerga borib, boshqa konsert tashkilotchisi bilan gaplashib ko‘rishimizni aytgan. Borsak, “Surxon” guruhi aʼzosi Ilhom aka kutib olgan. U kishi konsertlarni ham o‘tkazadigan tashkilotchi ekan. Yaxshi kutib olib, dardimizni eshitdi. “Sizlarni yoshlar tanisa kerak, men-ku konsert berishdan qochmayman, ammo...” deb turganida ikkita qizchasi kelib, bizdan dastxat so‘ragan. “Bu akalaringni taniysizlarmi?” deb so‘raganida, ha, bular “Dizayn”da chiqishadi,— deb javob berishgan. Shundan keyin Ilhom aka bir kun katta saroyda konsert o‘tkazib berishga rozi bo‘lgan. Evaziga “Surxon” guruhining ikki kunlik konsertida boshlovchi bo‘lish vazifasini yuklagan, — deydi Dilshod Musabekov.
Videoni to‘liq holda YouTube’dagi kanalimiz orqali tomosha qiling.
Izoh (0)