Sergeli tumani hokimi Elbek Shukurov Alter Ego loyihasiga bergan intervyusida tuman hokimlarining oylik maoshi miqdorini ma’lum qildi, deya xabar qilmoqda “Gazeta.uz”.
“Hokim ‘premiya’ bilan 5 milliondan 6 million so‘mgacha oladi. Ish haqi miqdori bir xil, lekin tumanlar hokimlari o‘z xodimlariga o‘zlari bajargan budjetiga qarab rag‘bat pullarini belgilash huquqiga ega”, — dedi Elbek Shukurov.
“Ma’lum bir mablag‘ bo‘ladi, agar siz bu budjetni amalga oshirsangiz, hisobingizda qanchadir miqdorda mablag‘ paydo bo‘ladi. Ulardan ma’lum miqdorini ehtiyojlarga yo‘naltira olasiz, ya’ni o‘zingiz uni taqsimlashingiz mumkin”, — deya tushuntirdi Elbek Shukurov.
Hokimning so‘zlariga ko‘ra, u o‘ziga boshqa xodimlar bilan bir xil “premiya” puli ajratadi.
“Agar o‘zimga rag‘bat pulini yozmasam, ‘unga ish haqi kerak emas, kimdir unga (pul) olib kirib beradi’ deb o‘ylashi aniq. Ko‘proq yozish — adolatdan emas. Chunki ular mendan kam ishlashmasliklarini ko‘raman. Shuning uchun o‘rtacha ‘premiya’ yoziladi.
Qaysidir xodimlarimning ‘premiya’si menikidan ham ko‘p bo‘ladi. Men o‘zim belgilayman. Ularning orasida haqiqatan ko‘proq ishlab, o‘zini ko‘rsatganlar bo‘ladi”, — deya ta’kidladi Sergeli tumani hokimi.
Bundan avval Sergeli tumani rahbari Elbek Shukurov hokim lavozimiga qanday tayinlanganini gapirib bergani hamda Toshkent shahridagi tumanlarni Toshkent viloyatidagi shahar va tumanlarga biriktirish siyosati haqida fikr bildirgani haqida xabar berilgandi.
Izoh (0)