Buxoro aeroporti orqali tarixiy ahamiyatga ega bo‘lgan 96 dona numizmatika ashyolarini olib chiqib ketmoqchi bo‘lgan shaxs to‘xtatib qolindi. Bu haqda Buxoro viloyati bojxona boshqarmasi matbuot xizmati xabar berdi.
Buxoro—Vnukovo aviareysi orqali harakatlanayotgan fuqaro “Buxoro Aeroporti” chegara bojxona postining bojxona nazorati zonasidan o‘tish chog‘ida, uning kuzatib boriladigan bagaji inspeksion ko‘rik majmuasi yordamida skanerdan o‘tkazilgan. Natijada hech qanday tegishli hujjatlarda ko‘rsatilmagan va bojxona xodimining og‘zaki so‘rovida maʼlum qilmagan jami 96 dona tarixiy tangalar borligi aniqlangan.
Hozirda mazkur numizmatika buyumlarining qadimiylik darajasini aniqlash maqsadida Buxoro viloyati madaniy meros boshqarmasi tomonidan badiiy ekspertiza tayinlangan bo‘lib, holat yuzasidan tergovga qadar tekshiruv harakatlari olib borilmoqda.
“Madaniy boyliklarning olib chiqilishi va olib kirilishi to‘g‘risida”gi qonunga asosan zarb etilganligiga 50 yildan oshgan numizmatika buyumlarini mamlakatimiz hududidan olib chiqib ketish taqiqlanadi.
Bundan oldin Buxoro xalqaro aeroportida qadimiy tangalarni olib chiqmoqchi bo‘lgan erkak to‘xtatib qolingani, Samarqandda Kushonlar davriga oid tangalarni chetga olib chiqib ketmoqchi bo‘lgan fuqaro aniqlangani to‘g‘risida xabar berilgandi.
Izoh (0)