“O‘zbekiston temir yo‘llari” Qirg‘izistonga yuk tashish uchun vagonlar beradi

“O‘zbekiston temir yo‘llari” AJ va “Qirg‘iziston temir yo‘li” MK davlat korxonasi o‘rtasida o‘tkazilgan uchrashuvda ikki mamlakat o‘rtasidagi munosabatlarni mustahkamlashga qaratilgan masalalar muhokama qilindi.

Qayd etilishicha, muzokaralarning asosiy mavzularidan biri temir yo‘l orqali yuklarni tashish uchun qulay shart-sharoitlarni yaratish bo‘lgan. Tomonlar Qirg‘izistondan O‘zbekistonga yuk tashish uchun “O‘zbekiston temir yo‘llari” AJ tomonidan vagonlar berish masalasini muhokama qilgan, bu esa mamlakatlar o‘rtasidagi savdo-iqtisodiy aloqalarni rivojlantirishga yordam beradi.

Shuningdek, Qirg‘iziston mutaxassislarini O‘zbekiston oliy o‘quv yurtlarida o‘qitish masalalari ham ko‘rib chiqilgan. Tomonlar kadrlar malakasini oshirish va kasbiy ko‘nikmalarni rivojlantirish uchun taʼlim sohasidagi hamkorlikni kengaytirishga kelishib olgan.

Uchrashuvning muhim natijasi Toshkent—Baliqchi—Toshkent yo‘nalishi bo‘yicha mavsumiy yo‘lovchi poyezdlarining ishga tushirilishi muhokama qilingan. Ushbu tashabbus ikki mamlakat o‘rtasidagi yo‘lovchi aloqasini yaxshilashga va mintaqaning sayyohlik salohiyatini rivojlantirishga yordam beradi.

Bundan tashqari, tomonlar Xitoy—Qirg‘iziston—O‘zbekiston temir yo‘lini qurish loyihasini jadallashtirish bo‘yicha amaliy chora-tadbirlarni amalga oshirish to‘g‘risida kelishuvga erishgan. Ushbu loyiha mintaqada transport infratuzilmasini rivojlantirish va mamlakatlar o‘rtasidagi iqtisodiy aloqalarni mustahkamlash uchun strategik ahamiyatga ega ekani taʼkidlangan.

Uchrashuv yakunida erishilgan kelishuvlarni mustahkamlaydigan va temir yo‘l tarmog‘ida O‘zbekiston va Qirg‘iziston o‘rtasidagi hamkorlikni rivojlantirish muhimligini aks ettiruvchi tegishli protokol imzolangan.

Eslatib o‘tamiz, sentyabr oxirlarida prezident Shavkat Mirziyoyev huzurida temiryo‘l sohasida hal qilinishi lozim bo‘lgan asosiy masalalar yuzasidan yig‘ilish o‘tkazilgandi. O‘shanda “O‘zbekiston temir yo‘llari” xoldingga aylantirilishi, shuningdek, “O‘zbekiston temir yo‘llari”ning nosohaviy aktivlarini sotish vazifasi qo‘yilgani to‘g‘risida xabar berilgandi.