“O‘zbekiston temir yo‘llari”ning nosohaviy aktivlari sotiladi

“O‘zbekiston temir yo‘llari”ning nosohaviy aktivlarini sotish vazifasi qo‘yildi, deb xabar bermoqda Prezident matbuot xizmati.

Qayd etilishicha, mutasaddilarga temiryo‘l stansiyalari va ular atrofidagi bo‘sh maydonlardan unumli foydalanib, kompleks logistika xizmatlari hamda yirik ishlab chiqarish loyihalarini shakllantirish topshirildi. Sohada IT auditini o‘tkazib, malakali mutaxassislarni jalb qilgan holda “Yagona darcha” axborot tizimini yaratish zarurligi qayd etildi. Bunda, yuk tashish hujjatlarini elektron rasmiylashtirish, vagonlarga GPS o‘rnatish va onlayn ombor axborot tizimi yo‘lga qo‘yilishi lozim.

“O‘zbekiston temir yo‘llari”ning nosohaviy aktivlarini sotish yoki boshqa tarmoqlarga o‘tkazish, sotishdan tushgan mablag‘larni temiryo‘l infratuzilmasini yaxshilashga yo‘naltirish vazifasi qo‘yildi. Endilikda “O‘TY”ning nosohaviy aktivlarda ishtiroki qatʼiy taqiqlanadi. 

Shuningdek, mutasaddilarga barcha temiryo‘l kesishmalarini xatlovdan o‘tkazish va tartibga solishga topshiriq berildi.

Belgilangan chora-tadbirlar ijrosi bo‘yicha “yo‘l xaritasi”ni ishlab chiqib, uning amalga oshirilishi yuzasidan prezidentga muntazam axborot kiritib borish vazifasi qo‘yildi. Yig‘ilish yakunida soha uchun masʼullarning axboroti va takliflari tinglandi.