Toshkent metropoliteni “Beruniy” bekatida poyezdlarning belgilangan vaqtdan kechikishi kuzatilgani aytilgan xabarlarga munosabat bildirdi.
Qayd etilishicha, 3-noyabr kuni soat 07:57 lar atrofida “Beruniy” bekatiga kirib kelgan 33-sonli harakat tarkibi metropoliten xodimlari tomonidan tekshirilganda, nazoratsiz buyum mavjudligi aniqlangan.
Yo‘lovchilar va harakat xavfsizligini taʼminlash maqsadida, belgilangan yo‘riqnomaga asosan, ushbu poyezd tekshiruv yo‘lagiga yuborilgan. Tekshiruv natijalari davomida ushbu nazoratsiz buyum yo‘lovchilardan birining shaxsiy buyumi ekani aniqlangan.
Buning natijasida esa yo‘nalishdagi poyezdlar belgilangan jadvaldan bir muddat kechikkan holda harakatlangan.
“Shu o‘rinda yo‘lovchilardan metro xizmatidan foydalanishda o‘z shaxsiy buyumlariga eʼtiborli bo‘lishlarini yana bir bor eslatib o‘tamiz. Bu metro poyezdlari yo‘nalishlarda belgilangan jadvalga asosan harakatlanishi uchun asosiy turtki bo‘layotganini maʼlum qilamiz”, — deyiladi munosabatda.
Avvalroq 3—5-noyabr kunlari 3 kun muddatga, “Yer usti halqa yo‘li” yo‘nalishining “Tolariq” (10-bekat), “Xonobod” (11-bekat) va “Quruvchilar” (12-bekat) bekatlarida poyezdlar harakati to‘xtatilishi to‘g‘risida xabar berilgandi. Oktyabr o‘rtalarida Toshkent metropoliteni oxirgi vaqtda yo‘lovchilar soni oshib ketgani bois murojaat bilan chiqib, “yangi vagonlar kelishiga 2 oy qolgani”ni ma’lum qilgan edi.
Izoh (0)