Toshkent yerusti metrosining ayrim bekatlari 3 kunga yopiladi

Toshkent yerusti metrosining ayrim bekatlari 3-noyabrdan boshlab 3 kunga yopiladi.

Transport vaziriligi matbuot xizmatining ma’lum qilishicha, “Yerusti halqa yo‘li” yo‘nalishining II bosqichini foydalanishga topshirish ishlari doirasida 3—5-noyabr kunlari 3 kun muddatga “Tolariq” (10-bekat), “Xonobod” (11-bekat) va “Quruvchilar” (12-bekat) bekatlarida poyezdlar harakati to‘xtatiladi.

Shu munosabat bilan yo‘lovchilar tashish uzluksizligini taʼminlash maqsadida 1M-sonli “Chinor bekati – Quruvchilar bekati” oralig‘ida harakatlanuvchi avtobus yo‘nalishi harakati Qiyot metro bekatigacha uzaytiriladi.

Ushbu yo‘nalishda harakatlanuvchi avtobuslar soni 5 ta etib belgilandi. Yo‘nalishda King Long rusumli 18 metrli avtobuslar xizmat qiladi. Yo‘nalishdagi avtobuslar oraliq interval vaqti 10 daqiqa etib belgilandi. Yo‘nalish faqatgina metro bekatlarida yo‘lovchilarni avtobuslarga chiqarib tushirishni amalga oshiradi.

Maʼlumot uchun, hozirgi kunda, yerusti halqa metro yo‘nalishining Qiyot bekatidan Quruvchilar bekatigacha bo‘lgan oralig‘ida 2 ta (55, 130-sonli) avtobus yo‘nalishlari muntazam faoliyat yuritmoqda. Ushbu yo‘nalishlarda jami 22 ta Yutong CNG avtobuslari 10-12 daqiqalik oraliq interval bilan harakatlanadi. Metropoliten xizmatlaridan foydalanuvchi yo‘lovchilar 55, 130-sonli avtobus yo‘nalishlari xizmatlaridan ham foydalanishlari mumkin.