“Ўзбекистон темир йўллари” АЖ ва “Қирғизистон темир йўли” МК давлат корхонаси ўртасида ўтказилган учрашувда икки мамлакат ўртасидаги муносабатларни мустаҳкамлашга қаратилган масалалар муҳокама қилинди.
Қайд этилишича, музокараларнинг асосий мавзуларидан бири темир йўл орқали юкларни ташиш учун қулай шарт-шароитларни яратиш бўлган. Томонлар Қирғизистондан Ўзбекистонга юк ташиш учун “Ўзбекистон темир йўллари” АЖ томонидан вагонлар бериш масаласини муҳокама қилган, бу эса мамлакатлар ўртасидаги савдо-иқтисодий алоқаларни ривожлантиришга ёрдам беради.
Шунингдек, Қирғизистон мутахассисларини Ўзбекистон олий ўқув юртларида ўқитиш масалалари ҳам кўриб чиқилган. Томонлар кадрлар малакасини ошириш ва касбий кўникмаларни ривожлантириш учун таълим соҳасидаги ҳамкорликни кенгайтиришга келишиб олган.
Учрашувнинг муҳим натижаси Тошкент—Балиқчи—Тошкент йўналиши бўйича мавсумий йўловчи поездларининг ишга туширилиши муҳокама қилинган. Ушбу ташаббус икки мамлакат ўртасидаги йўловчи алоқасини яхшилашга ва минтақанинг сайёҳлик салоҳиятини ривожлантиришга ёрдам беради.
Бундан ташқари, томонлар Хитой—Қирғизистон—Ўзбекистон темир йўлини қуриш лойиҳасини жадаллаштириш бўйича амалий чора-тадбирларни амалга ошириш тўғрисида келишувга эришган. Ушбу лойиҳа минтақада транспорт инфратузилмасини ривожлантириш ва мамлакатлар ўртасидаги иқтисодий алоқаларни мустаҳкамлаш учун стратегик аҳамиятга эга экани таъкидланган.
Учрашув якунида эришилган келишувларни мустаҳкамлайдиган ва темир йўл тармоғида Ўзбекистон ва Қирғизистон ўртасидаги ҳамкорликни ривожлантириш муҳимлигини акс эттирувчи тегишли протокол имзоланган.
Эслатиб ўтамиз, сентябрь охирларида президент Шавкат Мирзиёев ҳузурида темирйўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.
Изоҳ (0)