Emmanuel Makronning O‘zbekistonga tashrifi birinchi kuni — suratlarda

Fransiya prezidenti Emmanuel Makron Shavkat Mirziyoyevning taklifiga binoan 1-noyabr kuni rasmiy tashrif bilan O‘zbekistonga keldi.

O‘zbekiston—Fransiya sammiti doirasidagi oliy darajadagi muzokaralar Samarqand shahrida bo‘lib o‘tadi. Davlat rahbari ham 1-noyabr kuni Samarqandga yetib bordi.

Samarqand xalqaro aeroportida oliy martabali mehmonni O‘zbekiston bosh vaziri Abdulla Aripov va boshqa rasmiylar kutib oldi.

Tashrif dasturiga muvofiq Emmanuel Makron O‘zbekiston prezidenti Shavkat Mirziyoyev hamrohligida tungi Samarqand bo‘ylab sayr qildi. Davlat rahbarlari  YUNЕSKOning Jahon merosi ro‘yxatiga kiritilgan Registon majmuasiga tashrif buyurdi.

Oliy martabali mehmonga ushbu Sharq me’morchiligi durdonasining qurilish tarixi, noyob naqshlari, ushbu maskan bilan bog‘liq mashhur voqea va shaxslar xususida so‘zlab berildi.

So‘ng prezidentlar “Buyuk ipak yo‘li” xalqaro turizm markazidagi “Boqiy shahar” tarixiy-etnografik majmuasida bo‘ldi. Fransiya delegatsiyasiga o‘zbek xalqining betakror badiiy, hunarmandlik va musiqiy madaniyati namoyish etildi. 

Tashrifning asosiy tadbirlari, shu jumladan, oliy darajadagi muzokaralar 2-noyabr kuni bo‘lib o‘tadi. Unda O‘zbekiston bilan Fransiya o‘rtasidagi ko‘p qirrali munosabatlarni yanada rivojlantirish masalalari ko‘rib chiqiladi. Savdo-iqtisodiyot, innovatsiya, investitsiya va madaniy-gumanitar sohalarda amaliy hamkorlikni kengaytirish masalalari e’tibor markazida bo‘ladi.

O‘zbekiston va Fransiya rahbarlari ikki mamlakatning yetakchi kompaniyalari va bank-moliya institutlari ishtirokidagi qo‘shma biznes forumi ishida ham ishtirok etadi. Sammit yakunida bir qator hukumatlararo va idoralararo bitimlar hamda savdo-investitsiyaviy kelishuvlar to‘plamini qabul qilish ko‘zda tutilgan.