Prezident qarori bilan Iqboljon Ergashev Ipakchilik va jun sanoatini rivojlantirish qo‘mitasi raisi lavozimiga tayinlandi. Bu haqda viloyat hokimligi matbuot xizmati xabar berdi.
Tayinlovga qadar u Farg‘ona viloyati hokimining o‘rinbosari – viloyat investitsiyalar va tashqi savdo boshqarmasi boshlig‘i lavozimida ishlab kelayotgan edi.
“Iqboljon Ergashev o‘tgan davrda viloyatimizga xorijiy investitsiyalar jalb etish, viloyatimizda ishlab chiqarilgan va yetishtirilgan mahsulotlarning xorijga eksporti hajmini oshirish, geografiyasini kengaytirish, Farg‘onada tadbirkorlikni rivojlantirish va qulay ishbilarmonlik muhitini yaratish borasida erishilgan yuqori natijalarga o‘z salmoqli hissasini qo‘shdi”, — deyiladi xabarda.
Avgust o‘rtalarida Bahrom Sharipov boshqa ishga o‘tishi munosabati bilan Ipakchilik va jun sanoatini rivojlantirish qo‘mitasi raisi lavozimidan ozod etilgandi. Prezidentning 2021-yil 8-iyuldagi qarori bilan Pillachilik va qorako‘lchilikni rivojlantirish qo‘mitasi Ipakchilik va jun sanoatini rivojlantirish qo‘mitasi deb qayta nomlangandi. Qo‘mitaga 2020-yil 15-sentyabrdan Bahrom Sharipov rahbarlik qilib kelgan.
Izoh (0)