Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 2—3-noyabr kunlari Turkiy davlatlar tashkiloti Davlat rahbarlari kengashining navbatdagi yig‘ilishida ishtirok etish uchun amaliy tashrif bilan Ostona shahrida bo‘ladi. Bu haqda prezident matbuot xizmati xabar berdi.
Qayd etilishicha, sammit kun tartibidan tashkilot doirasidagi ko‘p tomonlama hamkorlikni, eng avvalo, savdo-iqtisodiyot, investitsiya, transport-kommunikatsiya, ekologiya, madaniy-gumanitar va boshqa sohalarda yanada rivojlantirish masalalari o‘rin olgan.
Delegatsiyalar rahbarlari xalqaro siyosat va mintaqaviy hamkorlikning dolzarb masalalari yuzasidan ham fikr almashadilar.
Tadbirlar yakunida qator qo‘shma hujjatlar qabul qilinishi ko‘zda tutilgan. 2023-yilda Turkiy davlatlar tashkilotiga O‘zbekiston raislik qilmoqda. Ko‘p qirrali hamkorlikni yanada chuqurlashtirishga qaratilgan 100 dan ortiq muhim tadbir o‘tkazilgan.
Tashkilotga O‘zbekiston, Ozarbayjon, Qozog‘iston, Qirg‘iziston va Turkiya a’zo, Vengriya va Turkmaniston tashkilotda kuzatuvchilardir.
Eslatib o‘tamiz, Samarqandda 2022-yil 10—11-noyabr kunlari Turkiy davlatlar tashkilotining birinchi sammiti o‘tkazilgandi.
Izoh (0)