Эммануэл Макроннинг Ўзбекистонга ташрифи биринчи куни — суратларда

Франция президенти Эммануэл Макрон Шавкат Мирзиёевнинг таклифига биноан 1 ноябрь куни расмий ташриф билан Ўзбекистонга келди.

Ўзбекистон—Франция саммити доирасидаги олий даражадаги музокаралар Самарқанд шаҳрида бўлиб ўтади. Давлат раҳбари ҳам 1 ноябрь куни Самарқандга етиб борди.

Самарқанд халқаро аэропортида олий мартабали меҳмонни Ўзбекистон бош вазири Абдулла Арипов ва бошқа расмийлар кутиб олди.

Ташриф дастурига мувофиқ Эммануэл Макрон Ўзбекистон президенти Шавкат Мирзиёев ҳамроҳлигида тунги Самарқанд бўйлаб сайр қилди. Давлат раҳбарлари  ЮНЕСКОнинг Жаҳон мероси рўйхатига киритилган Регистон мажмуасига ташриф буюрди.

Олий мартабали меҳмонга ушбу Шарқ меъморчилиги дурдонасининг қурилиш тарихи, ноёб нақшлари, ушбу маскан билан боғлиқ машҳур воқеа ва шахслар хусусида сўзлаб берилди.

Сўнг президентлар “Буюк ипак йўли” халқаро туризм марказидаги “Боқий шаҳар” тарихий-этнографик мажмуасида бўлди. Франция делегациясига ўзбек халқининг бетакрор бадиий, ҳунармандлик ва мусиқий маданияти намойиш этилди. 

Ташрифнинг асосий тадбирлари, шу жумладан, олий даражадаги музокаралар 2 ноябрь куни бўлиб ўтади. Унда Ўзбекистон билан Франция ўртасидаги кўп қиррали муносабатларни янада ривожлантириш масалалари кўриб чиқилади. Савдо-иқтисодиёт, инновация, инвестиция ва маданий-гуманитар соҳаларда амалий ҳамкорликни кенгайтириш масалалари эътибор марказида бўлади.

Ўзбекистон ва Франция раҳбарлари икки мамлакатнинг етакчи компаниялари ва банк-молия институтлари иштирокидаги қўшма бизнес форуми ишида ҳам иштирок этади. Саммит якунида бир қатор ҳукуматлараро ва идоралараро битимлар ҳамда савдо-инвестициявий келишувлар тўпламини қабул қилиш кўзда тутилган.