2023 yil 10 avgust kuni ichki ishlar vaziri Po‘lat Bobojonov bu haqidagi buyruqni imzolagan. Buyruq iqtisodiyot va moliya vazirligi bilan kelishilgan.
Unga ko‘ra, 2023 yil 1 noyabrdan boshlab ro‘yxatdan o‘tkazish davlat raqami belgilarini berish, yaroqsiz holga kelgan, shikastlangan yoki buzilganlari o‘rniga yangi ro‘yxatdan o‘tkazish davlat raqami belgilarini berishda undiriladigan to‘lovlar stavkalari o‘zgaradi.
Ushbu to‘lov miqdorlari 2011 yildan buyon o‘zgarmagandi.
2023 yil 1 noyabrdan to‘lov miqdorlari quyidagicha bo‘ladi:
1. Avtotransport vositalariga ro‘yxatdan o‘tkazish davlat raqami belgilari (RO‘DRB) uchun - bazaviy hisoblash miqdorining 3,5 baravari miqdorida (1 155 000 so‘m) — hozir 495 000 so‘m;
2. Mototransport vositalari, motorollerlar va tirkamalarga (yarim tirkamalar) RO‘DRB uchun - bazaviy hisoblash miqdorining 1,75 baravari miqdorida (577 500 so‘m) — hozir 247 500 so‘m;
3. Tranzit RO‘DRB uchun - bazaviy hisoblash miqdorining 25 foizi miqdorida (82 500 so‘m) — hozir ham 82 500 so‘m;
4. Yaroqsiz holga kelgan, buzilgan yoki shikastlangan bir juft RO‘DRB o‘rniga yangi RO‘DRB berish uchun - bazaviy hisoblash miqdorining 3,5 baravari miqdorida (1 155 000 so‘m) — hozir 330 000 so‘m;
5. Yaroqsiz holga kelgan, buzilgan yoki shikastlangan bir dona RO‘DRB o‘rniga yangi RO‘DRB berish uchun - bazaviy hisoblash miqdorining 1,75 baravari miqdorida (577 500 so‘m) — hozir 165 000 so‘m.
Shuningdek:
-yo‘qotilgan bir dona yoki bir juft RO‘DRB o‘rniga yangi bir juft RO‘DRB berish uchun bazaviy hisoblash miqdorining 3,5 baravari miqdorida undiriladi (1 155 000 so‘m) — hozir 990 000 so‘m;
-yo‘qotilgan bir dona RO‘DRB (mototransport vositalari, motorollerlar va tirkamalar (yarim tirkamalar) uchun) o‘rniga yangi bir dona RO‘DRB berish uchun bazaviy hisoblash miqdorining 1,75 baravari miqdorida undiriladi (577 500 so‘m);
-RO‘DRBni o‘n ikki oy muddatdan so‘ng yana bir yil muddatga saqlaganlik uchun bazaviy hisoblash miqdorining 1 baravari miqdorida undiriladi (330 000 so‘m);
-O‘zbekiston Respublikasi mehnat organlari tomonidan nogironligi bo‘lgan shaxslarga imtiyozli shartlarda berilgan transport vositasiga RO‘DRBlarini berish uchun to‘lov undirilmaydi.
Ma’lumot uchun, bazaviy hisoblash miqdori 2023-yil 1-maydan boshlab 330 ming so‘m etib belgilangan.
Izoh (0)