O‘zbekistondagi beshta arxeologik yodgorlik ochiq osmon ostidagi muzey va sayyohlik obyektlariga aylanadi. Bu haqda Madaniy meros agentligi matbuot xizmati xabar berdi.
Qayd etilishicha, Madaniy meros agentligi xodimlari Fanlar akademiyasi, Qoraqalpog‘iston Vazirlar Kengashi, viloyatlar va Toshkent shahar hokimliklari hamda arxeologiya sohasi mutaxassislari bilan hamkorlikda arxeologiya yodgorliklarini konservatsiyalash, ularda ochiq osmon ostidagi muzeylar tashkil etish bo‘yicha ilmiy-tadqiqot ishlarini olib bormoqda.
Hududiy restavratsiya markazlari tomonidan Toshkentdagi “Chilonzor Oqtepa”, Surxondaryo viloyatidagi “Dalverzintepa”, Andijon viloyatidagi “Mingtepa”, Samarqand viloyatidagi “Sheroz qalʼa”, Ellikqalʼa tumanidagi “Qo‘yqirilgan qalʼa” arxeologik yodgorliklarida qator ishlar amalga oshirilgan.
“Sheroz qalʼa” arxeologik yodgorliklarini muzeylashtirish uchun Madaniy meros agentligi tomonidan 1 milliard so‘m, “Dalverzintepa” 800 million so‘m, “Chilonzor Oqtepa”ga 500 million so‘m mablag‘ ajratilgan.
“Obyektlarning konvervatsiyalanadigan qismlari metall konstruksiyalar bilan qoplangan yoki panjara bilan o‘ralgan bo‘ladi. Kuzatuv maydonchalari qurish, tashrif buyuruvchilar uchun o‘rindiqlar joylashtirish, yo‘lakchalar yotqizish, lampalar o‘rnatish ham rejalashtirilgan”, — deyiladi xabarda.
Bundan oldin Surxondaryoda arxeologiya yodgorligi fuqaroga bog‘dorchilik uchun berib yuborilgani aniqlangani, Buxoroda 5 ta arxeologiya yodgorligiga 291 mlrd so‘m zarar yetkazilgani, Surxondaryoda arxeologik yodgorliklar tuprog‘idan molxona, hojatxona qurilgani to‘g‘risida xabar berilgandi.
Izoh (0)