Favqulodda vaziyatlar vazirligi Shayxontohur tumanida joylashgan savdo majmuasida sodir bo‘lgan yong‘in to‘g‘risida maʼlumot berdi.
Qayd etilishicha, 28-oktabr kuni soat 06:58 da Shayxontohur tumani “Bo‘ston” MFY, Beruniy ko‘chasida joylashgan “Ekobozor” majmuasida yong‘in sodir bo‘layotgani to‘g‘risida shahar FVBga xabar tushgan.
Shunga ko‘ra beshta yong‘in-qutqaruv ekipaji soat 07:04 da voqea joyiga yetib borib, yong‘in soat 07:19 o‘rab olingan va soat 07:26 da o‘chirilgan.
Yong‘in natijasida savdo majmuasining 80 kvadrat metr tashqi devor qoplamasi qismi va shu joydagi kafening 70 kvadrat metr maydonida ichki va tom qismi yonib zararlangan. Qutqaruvchilarning tezkor harakatlari natijasida savdo majmuasining 7000 kvadrat metr maydoni yong‘indan saqlab qolingan.
“Hodisa oqibatida tan jarohati olgan va halok bo‘lganlar yo‘q. Yong‘in sababi va moddiy zarar miqdori aniqlanmoqda”, — deyiladi xabarda.
Eslatib o‘tamiz, 14-oktyabr kuni Toshkent shahar Mirobod tumanida joylashgan qurilish binosida yong‘in sodir bo‘lgandi. Undan oldinroq esa Navoiy viloyati Uchquduq tumanida joylashgan sport majmuasida yirik yong‘in yuz bergani to‘g‘risida xabar berilgan edi.
Izoh (0)