Фавқулодда вазиятлар вазирлиги Шайхонтоҳур туманида жойлашган савдо мажмуасида содир бўлган ёнғин тўғрисида маълумот берди.
Қайд этилишича, 28-октябрь куни соат 06:58 да Шайхонтоҳур тумани “Бўстон” МФЙ, Беруний кўчасида жойлашган “Экобозор” мажмуасида ёнғин содир бўлаётгани тўғрисида шаҳар ФВБга хабар тушган.
Шунга кўра бешта ёнғин-қутқарув экипажи соат 07:04 да воқеа жойига етиб бориб, ёнғин соат 07:19 ўраб олинган ва соат 07:26 да ўчирилган.
Ёнғин натижасида савдо мажмуасининг 80 квадрат метр ташқи девор қопламаси қисми ва шу жойдаги кафенинг 70 квадрат метр майдонида ички ва том қисми ёниб зарарланган. Қутқарувчиларнинг тезкор ҳаракатлари натижасида савдо мажмуасининг 7000 квадрат метр майдони ёнғиндан сақлаб қолинган.
“Ҳодиса оқибатида тан жароҳати олган ва ҳалок бўлганлар йўқ. Ёнғин сабаби ва моддий зарар миқдори аниқланмоқда”, — дейилади хабарда.
Эслатиб ўтамиз, 14 октябрь куни Тошкент шаҳар Миробод туманида жойлашган қурилиш биносида ёнғин содир бўлганди. Ундан олдинроқ эса Навоий вилояти Учқудуқ туманида жойлашган спорт мажмуасида йирик ёнғин юз бергани тўғрисида хабар берилган эди.
Изоҳ (0)