Qozog‘iston Milliy banki vaqtinchalik propiskasi yoki yashash uchun ruxsatnomasi bo‘lmagan xorijliklarga bank kartalari chiqarishni taqiqlashni taklif etadigan qaror loyihasini ishlab chiqdi, deb yozmoqda Forbes hujjatga tayanib.
Milliy bankning fikricha, bu o‘zgarish Qozog‘iston norezidentlari tomonidan noqonuniy operatsiyalar, jumladan, “noqonuniy giyohvand moddalar savdosi va qimor o‘yinlari” uchun kartalardan foydalanish xavfini kamaytiradi.
Hujjatga ko‘ra, to‘lov kartasi faqat mijozning shaxsan ishtirokida va uning Qozog‘iston hududida yashayotganini tasdiqlovchi hujjatlar asosida chiqarib beriladi. Bunday hujjatlarga mehnat shartnomasi, ta’lim shartnomasi va yashash uchun ruxsatnoma kiradi.
Milliy bank qarori loyihasi 9-noyabrga qadar jamoatchilik muhokamasiga qo‘yiladi.
Ukrainada Rossiyaga qarshi keng ko‘lamli urush boshlanganidan so‘ng, Visa va Mastercard to‘lov tizimlari Rossiyada o‘z faoliyatini to‘xtatganini e’lon qildi. Ko‘p o‘tmay, “karta turizmi” ruslar orasida ommalashdi. Qozog‘iston rossiyaliklar xorijiy bank kartasini olishga boradigan asosiy yo‘nalishlardan biriga aylandi.
Izoh (0)