Qozog‘iston G‘azodagi fuqarolarini evakuatsiya qiladi

Qozog‘iston G‘azo sektorida qolib ketgan fuqarolarini Misr orqali evakuatsiya qilishga urinib ko‘radi. Bu haqda “Orda.kz” xabar berdi.

Qozog‘iston tashqi ishlar vazirining birinchi o‘rinbosari Qayrat Umarov Senat yig‘ilishida bu haqda ma’lumot berdi.

Vazir o‘rinbosari qozog‘istonliklarni G‘azo sektoridan evakuatsiya qilish oson emasligini ta’kidladi. Sektorning o‘qqa tutilishi bu jarayonni murakkablashtiradi. Umarovning so‘zlariga ko‘ra, G‘azo sektori orqali o‘tadigan yagona yo‘l — Rafah yopilgan.

“Shuning uchun biz tomondan diplomatik vakolatxonalarimiz G‘azoda bo‘lgan fuqarolarimiz bilan doimiy aloqada. Misr hukumati bilan ishlayapmiz. Fuqarolarimizni bu hududdan olib chiqib ketishlarini taʼminlash maqsadida hududdagi boshqa turli mutasaddilar bilan hamkorlikda ishlayapmiz”, — dedi Qayrat Umarov.

TIV shuningdek, 45 davlat G‘azo sektoridan tinch aholini olib chiqish masalasi ustida ish olib borayotganini, ammo hozircha muvaffaqiyatga erishmaganini qo‘shimcha qildi. Shuning uchun ular endi faqat gumanitar yordam ko'rsatishi mumkin.