Қозоғистон Миллий банки вақтинчалик пропискаси ёки яшаш учун рухсатномаси бўлмаган хорижликларга банк карталари чиқаришни тақиқлашни таклиф этадиган қарор лойиҳасини ишлаб чиқди, деб ёзмоқда Forbes ҳужжатга таяниб.
Миллий банкнинг фикрича, бу ўзгариш Қозоғистон норезидентлари томонидан ноқонуний операциялар, жумладан, “ноқонуний гиёҳванд моддалар савдоси ва қимор ўйинлари” учун карталардан фойдаланиш хавфини камайтиради.
Ҳужжатга кўра, тўлов картаси фақат мижознинг шахсан иштирокида ва унинг Қозоғистон ҳудудида яшаётганини тасдиқловчи ҳужжатлар асосида чиқариб берилади. Бундай ҳужжатларга меҳнат шартномаси, таълим шартномаси ва яшаш учун рухсатнома киради.
Миллий банк қарори лойиҳаси 9 ноябрга қадар жамоатчилик муҳокамасига қўйилади.
Украинада Россияга қарши кенг кўламли уруш бошланганидан сўнг, Visa ва Mastercard тўлов тизимлари Россияда ўз фаолиятини тўхтатганини эълон қилди. Кўп ўтмай, “карта туризми” руслар орасида оммалашди. Қозоғистон россияликлар хорижий банк картасини олишга борадиган асосий йўналишлардан бирига айланди.
Изоҳ (0)