Qozog‘iston Mudofaa vazirligi Olmaotada “NATO markazi” ochilgani haqida Telegram kanallarida tarqalgan maʼlumotni rad etdi, deb yozmoqda “Sputnik.kz”.
“Qozog‘iston Mudofaa vazirligiga tegishli tinchlikparvar operatsiyalar markazi yangi konferens-zalining rasmiy ochilishi Olmaota shahrida AQSHning Qozog‘istondagi elchisi Daniel Rozenblum ishtirokida bo‘lib o‘tdi.
Markaz 2006-yildan buyon Qozog‘iston Qurolli kuchlarining tinchlikparvar bo‘linmasini rivojlantirish bo‘yicha ta’lim muassasasi sifatida faoliyat yuritib kelmoqda. Uning asosiy maqsadi BMT standartlari bo‘yicha tinchlikparvar operatsiyalarda ishtirok etish uchun shaxsiy tarkibni tayyorlashdan iborat”, — deyiladi Mudofaa vazirligi xabarida.
Konferens-zalining ochilishi haqidagi maʼlumotni Qozog‘istondagi AQSH elchixonasining Facebook rasmiy sahifasidan ham olish mumkin.
“Elchi Rozenblum Qozog‘iston Tinchlik operatsiyalari markazida yangi konferens-zalining tantanali ochilish marosimida ishtirok etish sharafiga muyassar bo‘ldi. Bu bino Qozog‘istonning xalqaro tinchlikparvar kuchlarni tayyorlash imkoniyatlarini kengaytirish maqsadida Amerika Qo‘shma Shtatlari tomonidan qo‘llab-quvvatlangan so‘nggi loyihadir. Qo‘shma Shtatlar xavfsizlik, farovonlik va tinchlikni saqlash manfaatlari yo‘lida Qozog‘iston bilan hamkorlik qilishdan faxrlanadi”, — deb ta’kidlagan diplomatik missiya.
Bir kun avval qator ommaviy sahifalarda Olmaotada “NATO markazi” ochilgani, unda AQSHning Qozog‘istondagi elchisi ishtirok etgani va u yerda tinchlikparvar kuchlar go‘yoki “NATO standartlari bo‘yicha” (aslida BMT standartlari) o‘qitilishi haqida xabar berilgandi.
Ushbu xabarlarga Rossiya prezidenti matbuot kotibi Dmitriy Peskov ham munosabat bildirdi.
“Tinchlikni saqlash missiyalarining o‘ziga xos xususiyatlari bor. Qozoq harbiylari dunyoning turli burchaklarida shunday missiyalarda qatnashmoqda, ammo butun o‘qitish jarayonining amerikaliklar tomonidan olib borilishi haqida, albatta, biz Ostonadagi do‘stlarimizdan qo‘shimcha ma’lumot kutamiz” — dedi u.
Izoh (0)