Xitoy mudofaa vaziri lavozimidan chetlatildi. Bu haqda 24-oktyabr kuni South China Morning Post (SCMP) xabar berdi.
“Iste’foga chiqish to‘g‘risidagi qaror Butunxitoy xalq vakillari kengashining doimiy qo‘mitasi tomonidan ma’qullandi”, — deb ta’kidlaydi nashr.
General bir necha haftadan beri g‘oyib bo‘lgan, uning taqdiri haqida turli mish-mishlar tarqalmoqda. AQSH sanksiyalari ostidagi Li Shangfu avgust oyi oxiridan beri omma oldida ko‘rinmagan.
SCMP Li Shangfu iste’fosi haqidagi ma’lumot Pentagon delegatsiyasi Pekinga kelishidan bir necha kun oldin ma’lum bo‘lganiga e’tibor qaratdi. Mutaxassislarning fikricha, bu tashrif Xitoy va AQSH o‘rtasidagi yuqori darajadagi harbiy aloqalarni qayta tiklash uchun debocha bo‘lishi mumkin.
Davlat ommaviy axborot vositalari Li Shangfuning iste’foga chiqishi sababini yoki uning o‘rnini egallaydigan nomzod ismini ochiqlamadi. Mudofaa vazirining iste’foga chiqishi Xitoy Qurolli kuchlari rahbariyatida boshqa kadrlar o‘zgarishiga olib keladimi yoki yo‘qligi ham noma’lum.
Bundan tashqari, Bloomberg xabar berishicha, Shansi provinsiyasining sobiq gubernatori Lan Foan Xitoy Xalq Respublikasi moliya vaziri lavozimiga tayinlangan: u ushbu lavozimda Lyu Kunning o‘rnini egallagan. Sentyabr oyi oxirida moliya vazirining yaqin orada almashishi haqida insayder ma’lumot olgan Financial Times gazetasi Lan Foanning tayinlanishi Xitoy raisi Si Szinpinning iqtisodiy jamoasidagi o‘zgarishlar yakuni bo‘lishini ta’kidlagandi.
Izoh (0)