Iyul oyida “g‘oyib bo‘lgan” sobiq Xitoy tashqi ishlar vaziri Sin Gan amerikalik ma’shuqasi tufayli ishdan bo‘shatilgan. Bu haqda yuqori lavozimli amaldorlarning so‘zlariga tayanib, The Wall Street Journal xabar berdi.
Ma’lum qilinishicha, Sin Gan Xitoyning Vashingtondagi elchisi bo‘lib ishlagan vaqtida nikohdan tashqari aloqada bo‘lgan. Ammo, aftidan, Xitoy rasmiylari bu haqda Gan 2022-yil dekabr oyida tashqi ishlar vaziri lavozimiga ko‘tarilganidan keyingina xabar topgan.
Manbalarga ko‘ra, Sin Gan hozir tergov ostida va Xitoy huquq-tartibot idoralari bilan hamkorlik qilmoqda. Tergovchilar ishdan bo‘shatilgan vazirning nikohdan tashqari munosabatlari Xitoy milliy xavfsizligiga putur yetkazgan yoki yo‘qligini tekshirmoqda.
Tergov Sin Ganning Qo‘shma Shtatlardagi elchi sifatidagi faoliyati davomidagi “intrigalari”ni tasdiqlagan. Shuningdek, diplomatning Amerikada hatto nikohsiz farzandi ham borligi aytilmoqda.
“Amerika Ovozi”ning xabar berishicha, 18-sentabr kuni bo‘lib o‘tgan brifingda Xitoy Tashqi ishlar vazirligi vakili Mao Nindan tegishli xabarlar haqida so‘ralgan.
“Xitoy tomoni Xitoy tashqi ishlar vazirining tayinlanishi va ishdan bo‘shatilishi haqida avval ham ma’lumot tarqatgan va siz aytayotgan boshqa ma‘lumotlar haqida bilmayman”, — degan Mao Nin.
Ta’kidlanishicha, tegishli savol va unga javob Xitoy Tashqi ishlar vazirligining rasmiy veb-saytida doimo e’lon qilinadigan brifing stenogrammasidan kesilgan.
Yozda Xitoy tashqi ishlar vaziri Sin Gan uzoq vaqt ommaga ko‘rinish bermagandi. Bu uning “sog‘lig‘idagi o‘zgarishlar” bilan izohlangan. Gan iste’foga chiqqani keyinroq ma’lum bo‘lgan. U atigi olti oy tashqi ishlar vaziri lavozimida ishlagandi.
Izoh (0)