Surxondaryo viloyati Denov tumanida propan gaz balloniga metan quymoqchi bo‘lgan “Jiguli” portlab ketdi.
Hodisa oqibatida ikki kishi halok bo‘lgan. “Kun.uz”ning viloyat IIB YHXB axborot xizmatiga tayanib ma’lum qilishicha, gaz balloni portlashi 19-oktyabr kuni sodir bo‘lgan.
Denov tumanida yashovchi fuqaro shu tumanda joylashgan “Denov-Mobil” MCHJ qarashli bo‘lgan metan gaz quyish shoxobchasiga propan balloni o‘rnatilgan “VAZ-2106” mashinasini boshqa bir fuqaroning mashinasi yordamida olib kelgan.
Mashinaga metan gaz quyish paytida unga o‘rnatilgan propan balloni portlab ketgan. Oqibatda gaz quyish shoxobchasi ishchisi va “VAZ-2106”ni shoxobchagacha olib kelishda yordam bergan ikkinchi haydovchi voqea joyida halok bo‘lgan.
“Jiguli” haydovchisi tan jarohati olib, shifoxonaga murojaat qilgan. Hozirda hodisa yuzasidan surishtiruv ishlari olib borilmoqda.
Gaz ballonlarining portlashiga bog‘liq holatlar
May boshlarida Qashqadaryo viloyati Muborak tumanidagi gaz quyish shoxobchasida Nexia-2 mashinasiga o‘rnatilgan gaz ballonida portlash sodir bo‘lgandi. Fevral oxirlarida esa Samarqanddagi metan zapravkada Nexia-3 gaz balloni portlashi oqibatida bir nafar ishchi halok bo‘lgan. Shuningdek, Qoraqalpog‘istondagi zapravkada Nexia-2 ning, Andijondagi gaz zapravkada esa Damas ning gaz balloni portlagani to‘g‘risida xabar berilgandi.
Izoh (0)