Qashqadaryo viloyati Muborak tumanidagi gaz quyish shoxobchasida 6-may kuni Nexia-2 mashinasiga o‘rnatilgan gaz ballonida portlash sodir bo‘ldi. Bu haqda viloyat FVB axborot xizmati xabar berdi.
Ma’lum qilinishicha, tumanning “Konchilar” MFY hududida joylashgan “Avtogaz” avtomobillarga gaz (metan) quyish shoxobchasida Nexia-2 rusumli avtomobilning gaz balloniga gaz quyish vaqtida yorilish (portlash) sodir bo‘lgan.
Natijada avtomobil orqa qismi to‘liq shikastlangan. Hodisa joyida yong‘in sodir bo‘lmagan.
Avtomashina yaqinida bo‘lgan bir nafar fuqaro yengil darajada tan jarohati olgan va u zudlik bilan tuman tibbiyot birlashmasiga yuborilgan. Hozirda holat bo‘yicha tegishli soha vakillari tomonidan surishtiruv ishlari olib borilmoqda.
Fevral oxirlarida Samarqanddagi metan zapravkada Nexia-3 gaz balloni portlashi oqibatida bir nafar ishchi halok bo‘lgandi. Shuningdek, Qoraqalpog‘istondagi zapravkada Nexia-2 gaz, Andijondagi gaz zapravkada esa Damas gaz balloni portlagani to‘g‘risida xabar berilgandi.
Izoh (0)