“ ‘Oy nuri’ detektiv agentligi” seriali (1985–1989)ning ssenariy muallifi
Glenn Gordon Keron loyihada suratga tushgan aktyor Bryus Uillis bilan hamon do‘stona munosabatda ekanligi haqida gapirib berdi.
“Uchrashuvimizning birinchi uch daqiqasida u meni taniyotganini his qilaman. Ammo gapirmaydi. Avvallari juda ko‘p o‘qirdi (ammo odamlar bu haqida bilishlarini istamasdi), endi esa o‘qish imkoniyatidan ham mahrum bo‘lgan. Til bilan bog‘liq ko‘nikmalar yo‘qotilganiga qaramay, u avvalgi Bryusligicha qolgan”, — deydi Keron.
Uning taʼkidlashicha, ssenariynavis aktyorning rafiqasi Emma Xemming va uning uch nafar qiz farzandi bilan ham tez-tez suhbatlashib turishga harakat qiladi.
Keron, shuningdek, aktyorning kasalligi shiddat bilan rivojlana boshlashidan oldin u bilan “ ‘Oy nuri’ detektiv agentligi” serialining kutilayotgan taqdimoti masalasini muhokama qilganini aytib o‘tgan. “Garchi endi bu haqda menga uning o‘zi ayta olmasa ham, Bryus odamlar shouni tomosha qilishlari mumkinligidan xursand ekanligini bilaman”, — deya qo‘shimcha qilgan ijodkor.
2022-yilning mart oyida aktyor Bryus Uillisning oila aʼzolari uning ijodiy faoliyati yakuniga yetgani, Gollivud yulduzida afaziya — bosh miya qobig‘i shikastlanishi natijasida yuzaga keladigan nutq buzilishi aniqlanganini maʼlum qilgan edi. 2023-yilda aktyorga demensiya tashxisi qo‘yilgan, afaziya esa uning belgilaridan biri bo‘lgan.
Kasallik so‘nggi vaqtlarda aktyorning ishlashiga xalal bera boshlagan edi. 2020-yili “G‘alla dalasidagi tun” trilleri ustida ish olib borayotgan Bryus Uillis suratga olish maydonchasida ekanligini unutib qo‘ygan. Filmdagi sahnalardan biri tamaddixonada suratga olinayotgan vaqtda aktyor jarayonni yoddan chiqarib, bu yerga tushlik qilish uchun kelganman, deb o‘ylagan.
Izoh (0)