Hind kinosining tirik afsonasi — Hema Malini 16-oktyabr kuni 75 yoshni qarshi oldi. Shu munosabat bilan aktrisaning hayot va ijod yo‘liga nazar tashlaymiz.
Hema Malini Vijayantimala va Vohida Rehmandan keyin Bollivudning asosiy kino yulduziga aylangan uchinchi janubiy hind aktrisasi edi.
Faoliyatining eng yuqori cho‘qqisida u shunchalik mashhurlikka erishdiki, Dev Anand va Rajesh Xanna singari yetakchi aktyorlar muvaffaqiyatga erishish uchun unga murojaat qilishlari kerak edi. Dev Anandning 70-yillardagi filmlari, ayniqsa, Ziynat Aman bilan bo‘lgan filmlar kassada muvaffaqiyatsizlikka uchraganda Hema Malini bilan hamkorlikdagi “Kambag‘allar himoyachisi” filmi ommalashdi. Rajesh Xannaning filmlari muvaffaqiyatsizlikka uchraganda, uning “Sevgi shahri” filmi vaqtincha bo‘lsa ham hayotga yangi ruh bag‘ishladi.
Ajablanarlisi shundaki, Bollivudni zabt etgan aktrisa o‘z karyerasini janubda boshlagan. Eng qizig‘i, janubda uning faoliyati deyarli boshlanmasdan avval yakun topgan.
Hema 1948-yil 16-oktyabrda tug‘ilgan. Uning birinchi rejissori Shridxar uni 1964-yilda suratga olingan tamil filmidan haydab yuborgan, chunki uning yulduz bo‘lishiga ko‘zi yetmagan. Bundan ranjigan Hema eng muhim joyda, ya’ni Bollivud dunyosida muvaffaqiyat qozonishga qaror qildi. U nafaqat bunga erishdi, balki o‘sha rejissor Shridxar unga “Katta firibgarlik” filmida suratga tushish taklifi bilan keldi.
Hema Bollivuddagi karyerasini 1968-yilda “Orzular sotuvchisi” filmida Raj Kapur qarshisidagi buyuk Vijayantimalaning o‘rnini bosishdan boshladi. “Voris” va “Mening ismim Jonni” filmlari bilan Hema hind kinosining asosiy yulduziga aylandi. “Zita va Gita” uni umuman Bollivudning yuziga aylantirdi. Bu rol uchun Hema Filmfare mukofotiga sazovor bo‘ldi.
Bir qancha muvaffaqiyatli filmlar, ayniqsa, Dharmendra bilan hamkorlik, Hema Malinini shon-shuhratini yanada orttirdi. Birinchi marta “Chiroyli va o‘jar” va “Shon-sharaf” kabi loyihalarda birga o‘ynagan juftlik tomoshabinlar orasida katta shuhrat qozondi. Hema va Dharmendraning haqiqiy hayotdagi muhabbati ularning ekrandagi samimiyligini yanada oshirdi.
Hema Malini to‘g‘ri yo‘naltirilganida mahorat bilan jonli o‘ynay olishini isbotladi. Shuningdek, u o‘z filmografiyasida turli xil obrazlarni ijro etdi. Ayniqsa, rollari orasida beva ayol obrazi aktrisalarning ko‘pchiligi tomonidan rad etilgan, chunki ular o‘z imijini xavf ostiga qo‘yib, beva ayol va yosh onaning rolini o‘ynashni xohlamagan.
Hema bunday rollarni o‘z zimmasiga oldi va uning uddasidan chiqdi. Shuningdek, rejissor Gulzar bilan ishlash orqali o‘zining jozibali qiyofasini o‘zgartirishga urinib ko‘rdi va uning “Unutilgan xotin”, “Ikki qirg‘oq” va “Dunyo” filmlarida eng yaxshi rollarini o‘ynadi. Bundan tashqari, “Qasos va qonun” filmida o‘zini namoyon qildi, unda Basantini o‘ynadi.
Hema Malini 1970-yillar davomida Bollivud kino olamining yulduziga aylandi, o‘z davrining barcha yetakchi aktyorlari bilan birga ishladi. Uning birinchiligi 80-yillarning boshlarida, yana bir janubiy aktrisa Rekha maydonga kirganda tugadi.
Ammo Hema filmlarda ishtirok etishni davom ettirdi va endi kuchli qahramonlar rolini o‘ynay boshladi. Keyingi filmlari “Ko‘zi ojiz qonun”, “Beva ayol taqdiri” va “Ozodlik” bo‘ldi. Lekin, albatta, oila Hema uchun muhimroq edi. U ikkita qizini dunyoga keltirdi va ko‘p vaqtini ularning tarbiyasiga bag‘ishladi.
Oradan vaqt o‘tib, Hema Ravi Chopraning “Bog‘bon” filmida ekranlarga Amitabh Bachchan bilan qaytdi. Keyin “Vir va Zara” va “Ganga” kabilarni aytish mumkin.
Shaxsiy hayotda Hemaning ko‘plab muxlislari bor edi. Ular orasida Jitendra va Sanjiv Kumar aktrisaga turmush qurish taklifini bildirgan. Ammo Hema uylangan va to‘rtta farzandi borligiga qaramay, yuragini Dharmendraga berdi. U gap-so‘zlarga qaramay, 1979-yilda uning ikkinchi xotini bo‘lib, ikki qizi Esha va Axanani dunyoga keltirdi. Biroq aktrisaning axloqiy imiji shu qadar kuchli ediki, u deyarli matbuot va jamiyatning dashnomlariga duchor bo‘lmadi.
Hema Malini 1999-yilda hind kino san’atiga qo‘shgan hissasi uchun Padma Shri mukofotiga sazovor bo‘lgan va hozirda mamlakatning hukmron partiyasi BJP parlament a’zosi.
Izoh (0)