“ ‘Ой нури’ детектив агентлиги” сериали (1985–1989)нинг сценарий муаллифи
Гленн Гордон Керон лойиҳада суратга тушган актёр Брюс Уиллис билан ҳамон дўстона муносабатда эканлиги ҳақида гапириб берди.
“Учрашувимизнинг биринчи уч дақиқасида у мени таниётганини ҳис қиламан. Аммо гапирмайди. Авваллари жуда кўп ўқирди (аммо одамлар бу ҳақида билишларини истамасди), энди эса ўқиш имкониятидан ҳам маҳрум бўлган. Тил билан боғлиқ кўникмалар йўқотилганига қарамай, у аввалги Брюслигича қолган”, — дейди Керон.
Унинг таъкидлашича, сценарийнавис актёрнинг рафиқаси Эмма Хемминг ва унинг уч нафар қиз фарзанди билан ҳам тез-тез суҳбатлашиб туришга ҳаракат қилади.
Керон, шунингдек, актёрнинг касаллиги шиддат билан ривожлана бошлашидан олдин у билан “ ‘Ой нури’ детектив агентлиги” сериалининг кутилаётган тақдимоти масаласини муҳокама қилганини айтиб ўтган. “Гарчи энди бу ҳақда менга унинг ўзи айта олмаса ҳам, Брюс одамлар шоуни томоша қилишлари мумкинлигидан хурсанд эканлигини биламан”, — дея қўшимча қилган ижодкор.
2022 йилнинг март ойида актёр Брюс Уиллиснинг оила аъзолари унинг ижодий фаолияти якунига етгани, Голливуд юлдузида афазия — бош мия қобиғи шикастланиши натижасида юзага келадиган нутқ бузилиши аниқланганини маълум қилган эди. 2023 йилда актёрга деменция ташхиси қўйилган, афазия эса унинг белгиларидан бири бўлган.
Касаллик сўнгги вақтларда актёрнинг ишлашига халал бера бошлаган эди. 2020 йили “Ғалла даласидаги тун” триллери устида иш олиб бораётган Брюс Уиллис суратга олиш майдончасида эканлигини унутиб қўйган. Фильмдаги саҳналардан бири тамаддихонада суратга олинаётган вақтда актёр жараённи ёддан чиқариб, бу ерга тушлик қилиш учун келганман, деб ўйлаган.
Изоҳ (0)