O‘zbekistonda giyohvandlik vositalari bilan bog‘liq jinoyatlar uchun javobgarlik choralari kuchaytiriladi. Bu haqda Oliy sud tomonidan ishlab chiqilib, muhokama uchun e’lon qilingan qonun loyihasida ko‘zda tutilgan.
“Huquqbuzarliklarni oldini olish va jinoyatchilikka qarshi kurashish tartibi takomillashtirilishi munosabati bilan O‘zbekiston Respublikasi Jinoyat kodeksiga o‘zgartirish va qo‘shimchalar kiritish to‘g‘risida”gi qonun loyihasida qayd etilishicha, giyohvandlik vositalari, ularning analoglari yoki psixotrop moddalarni qonunga xilof ravishda o‘tkazish holatlari ko‘payib bormoqda, bu esa o‘z navbatida, giyohvandlik vositalari, ularning analoglari yoki psixotrop moddalarini ko‘payib borishiga, ularning isteʼmoliga voyaga yetmaganlarni keng jalb etish holatlari oshib borishiga olib kelmoqda.
Ushbu holatlar, mazkur qilmishlar uchun javobgarlikni qayta ko‘rib chiqish zaruratini yuzaga keltirmoqda.
Shu munosabat bilan, qonun bilan taqiqlangan ekinlarni yetishtirish, giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash hamda ularni qonunga xilof ravishda o‘tkazish, shuningdek, ularni o‘tkazish maqsadini ko‘zlamay qonunga xilof ravishda tayyorlash, egallash, saqlash uchun javobgarlik choralari kuchaytirilmoqda.
Xususan, 270-moddasida (taqiqlangan ekinlarni yetishtirish) belgilangan jinoyatni sodir etganlik uchun BHMning 35 baravaridan 60 baravarigacha miqdorda jarima yoki 360 soatgacha majburiy jamoat ishlari yoki 3 yilgacha axloq tuzatish ishlari yoxud 1 yildan 3 yilgacha ozodlikni cheklash yoki bir yildan 3 yilgacha ozodlikdan mahrum qilish bilan jazolash ko‘zda tutilmoqda. Amalda bu jinoyat uchun jarima miqdori BHMning 25 baravaridan boshlanadi.
O‘sha harakat:
- ilgari giyovandlik vositalari yoki psixotrop moddalar bilan qonunga xilof ravishda muomala qilishdan iborat jinoyatni sodir etgan shaxs tomonidan;
- bir guruh shaxslar tomonidan oldindan til biriktirib;
- o‘rtacha kattalikdagi ekin maydonida sodir etilgan bo‘lsa, —
BHMning 60 baravaridan 100 baravarigacha miqdorda jarima yoki 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolash belgilanmoqda. Amalda ushbu jinoyat uchun jarima miqdori BHMning 50 baravaridan boshlanadi.
Ushbu hujjat muhokamasi 27-oktyabrgacha davom etadi.
Izoh (0)